16-August-2023 -
By. sports desk
കൊച്ചി: പ്രീസീസണ്‍ ഒരുക്കങ്ങളുടെ അവസാന ഘട്ടമായി കേരള ബ്ലാസ്‌റ്റേഴ്‌സ് എഫ്‌സി അടുത്ത മാസം യുഎയിലേക്ക്. സെപ്റ്റംബര്‍ 5 മുതല്‍ 16 വരെ പതിനൊന്ന് ദിവസം നീണ്ടുനില്‍ക്കുന്ന പരിശീലന ക്യാമ്പാണ് ബ്ലാസ്‌റ്റേഴ്‌സിന് യുഎഇയിലുള്ളത്. യുഎഇ പ്രോലീഗ് ക്ലബ്ബുകളുമായി മൂന്ന് സൗഹൃദ മത്സരങ്ങളും ഈ കാലയളവില്‍ കേരള ബ്ലാസ്‌റ്റേഴ്‌സ് എഫ്‌സി കളിക്കും. പുതിയ അന്തരീക്ഷവുമായി ടീം അംഗങ്ങള്‍ക്ക് പൊരുത്തപ്പെടാനും ടീമിന്റെ മികവ് വിലയിരുത്താനും യുഎഇ പര്യടനം അവസരമൊരുക്കും. സെപ്റ്റംബര്‍ 9ന് അല്‍ വാസല്‍ എഫ്‌സിക്കെതിരെയാണ് സബീല്‍ സ്‌റ്റേഡിയത്തില്‍ കേരള ബ്ലാസ്‌റ്റേഴ്‌സിന്റെ ആദ്യ സൗഹൃദ മത്സരം. സെപ്റ്റംബര്‍ 12ന് ഷാര്‍ജ ഫുട്‌ബോള്‍ സ്‌റ്റേഡിയത്തില്‍ ഷാര്‍ജ ഫുട്‌ബോള്‍ ക്ലബ്ബിനെയും സെപ്റ്റംബര്‍ 15ന് കഴിഞ്ഞ വര്‍ഷത്തെ പ്രോ ലീഗ് ചാംപ്യന്മാരായ അല്‍ അഹ്ലിയെയും നേരിടും. ഷഹാബ് അല്‍ അഹ്ലി സ്‌റ്റേഡിയം അല്‍ അവിര്‍ ദുബായിലാണ് ബ്ലാസ്‌റ്റേഴ്‌സിന്റെ അല്‍ അഹ്ലിക്കെതിരായ പോരാട്ടം. മിഡില്‍ ഈസ്റ്റിലുള്ള വലിയൊരു വിഭാഗം കേരള ബ്ലാസ്‌റ്റേഴ്‌സ് ആരാധകരുമായി ബന്ധപ്പെടാനുള്ള അവസരമായും പ്രീസീസണ്‍ ടൂര്‍ മാറും. ആരാധകര്‍ക്ക് കേരള ബ്ലാസ്‌റ്റേഴ്‌സ് പോരാട്ടം കാണാനുള്ള അവസരം കൂടിയാണിത്.
ഫുട്‌ബോളിന്റെ വളര്‍ച്ചയാണ് തങ്ങളുടെ ദീര്‍ഘകാല ലക്ഷ്യമെന്നും കേരള ബ്ലാസ്‌റ്റേഴ്‌സുമായുള്ള പങ്കാളിത്തം പ്രഖ്യാപിക്കുന്നതില്‍ അതിയായ സന്തോഷമുണ്ടെന്നും എച്ച് 16 സ്‌പോര്‍ട്‌സ് ചെയര്‍മാന്‍ ഹസന്‍ അലി ഇബ്രാഹിം അല്‍ ബലൂഷി പറഞ്ഞു. 'കേരള ബ്ലാസ്‌റ്റേഴ്‌സ് പ്രീസീസണിന് ആതിഥേയത്വം വഹിക്കുന്നതില്‍ ഞങ്ങള്‍ ആവേശഭരിതരാണ്. ഇത് ഇന്‍ഡോഅറബ് ഫുട്‌ബോളിന്റെ ഒരു പുതിയ അധ്യായം അടയാളപ്പെടുത്തുന്നു. മികച്ച ക്ലബ്ബുകള്‍, പരിശീലനം, ആഗോള ആരാധകവൃന്ദം എന്നിവ അതില്‍ ഉള്‍പ്പെടുന്നു. ഹല ബ്ലാസ്‌റ്റേഴ്‌സ് 2023ന് ആശംസകളും നേരുന്നു.'ടൈറ്റില്‍ സ്‌പോണ്‍സറായ കൊമാകോ പവറിനോടുള്ള നന്ദിയും, വിലയേറിയ പിന്തുണ നല്‍കിയ കൊമാകോ ഗ്രൂപ്പിന്റെ ചെയര്‍മാന്‍ സുപിയന്‍ അസൈനാറിനും ഗ്രീന്‍ ഹാര്‍വെസ്റ്റ് ഇന്‍വെസ്റ്റ്‌മെന്റ് സിഇഒ ഫൈസല്‍ പുന്നക്കാടനും ഹൃദയംഗമമായ നന്ദി അറിയിക്കാനും ഞങ്ങള്‍ ആഗ്രഹിക്കുന്നു.'അദ്ദേഹം കൂട്ടിച്ചേര്‍ത്തു
'പ്രീസീസണിന്റെ അവസാന ഘട്ടത്തില്‍ കളിക്കാര്‍ക്കും സ്റ്റാഫിനും മികച്ച തയാറെടുപ്പ് നല്‍കുന്ന മൂന്ന് ഉയര്‍ന്ന തലത്തിലുള്ള മത്സരങ്ങള്‍ക്കായി ഞങ്ങള്‍ കാത്തിരിക്കുകയാണ്. കഴിഞ്ഞ സീസണില്‍ എച്ച്16 സുഗമമാക്കിയ പരിശീലന സൗകര്യങ്ങള്‍, ആരാധക പ്രവര്‍ത്തനങ്ങള്‍ എന്നിവ വളരെ മികച്ചതായിരുന്നു. മേഖലയിലെ ഞങ്ങളുടെ ആരാധകരെ അവര്‍ ഇഷ്ടപ്പെടുന്ന ക്ലബിലേക്ക് അടുപ്പിക്കുന്നതിനായി ഈ വര്‍ഷം വീണ്ടും അവരോടൊപ്പം പ്രവര്‍ത്തിക്കാന്‍ ഞങ്ങള്‍ ആഗ്രഹിക്കുന്നു.' കേരള ബ്ലാസ്‌റ്റേഴ്‌സ് എഫ്‌സി സ്‌പോട്ടിംഗ് ഡയറക്ടര്‍ കരോളിസ് സ്‌കിന്‍കിസ് പറഞ്ഞു. കൊച്ചിയില്‍ ഒരു മാസത്തെ പ്രീസീസണ്‍ പരിശീലനം പൂര്‍ത്തിയാക്കിയ ബ്ലാസ്‌റ്റേഴ്‌സ് നിലവില്‍ ഡ്യൂറന്റ് കപ്പിന്റെ 132ാം പതിപ്പില്‍ പങ്കെടുക്കാന്‍ കൊല്‍ക്കത്തയിലാണ്. സെപ്റ്റംബര്‍ അവസാനത്തോടെ ആരംഭിക്കുന്ന ഇന്ത്യന്‍ സൂപ്പര്‍ ലീഗിനെ മുന്‍പായുള്ള ഇവാന്‍ വുകോമനോവിച്ചിനും സംഘത്തിനുമുള്ള അവസാനവട്ട ഒരുക്കമായിരിക്കും യുഎഇ പര്യടനം.
