5-September-2023 -
By. sports desk
കൊച്ചി: കേരള ബ്ലാസ്‌റ്റേഴ്‌സ് എഫ്‌സി, 2023-24 ഹീറോ ഐഎസ്എല്‍ സീസണിനുള്ള തങ്ങളുടെ ഔദ്യോഗിക ആരോഗ്യ പങ്കാളികളായി ഫ്യൂച്ചര്‍ എയ്‌സ്് ഹോസ്പിറ്റലിനെ പ്രഖ്യാപിച്ചു. ഹീറോ ഇന്ത്യന്‍ സൂപ്പര്‍ ലീഗില്‍ കേരള ബ്ലാസ്‌റ്റേഴ്‌സ് താരങ്ങളുടെ ആരോഗ്യ കാര്യങ്ങളുടെ ചുമതല ഫ്യൂച്ചര്‍ എയ്‌സ് ഹോസ്പിറ്റലിനായിരിക്കും.കേരള ബ്ലാസ്‌റ്റേഴ്‌സ് എഫ്‌സിയുമായി ആരോഗ്യ പങ്കാളികളെന്ന നിലയില്‍ സഹകരിക്കുന്നതില്‍ ഞങ്ങള്‍ക്ക് അതിയായ സന്തോഷമുണ്ടെന്ന് ഫ്യൂച്ചര്‍ എയ്‌സ്് ഹോസ്പിറ്റല്‍ ഡയറക്ടര്‍ ആന്‍ഡ് സിഇഒ ഡോ. അന്‍വര്‍ ഹസന്‍ പറഞ്ഞു.
'ആരോഗ്യമാണ് സന്തോഷമെന്ന് ഞങ്ങള്‍ വിശ്വസിക്കുന്നു. ഫ്യൂച്ചര്‍ എയ്‌സിലൂടെ ഓരോരുത്തരെയും തങ്ങള്‍ ആരോഗ്യവാന്മാരാണെന്ന് പറയുന്നതിന് ആത്മവിശ്വാസം നല്‍കാനാണ് ഞങ്ങള്‍ ലക്ഷ്യമിടുന്നതും. കളത്തില്‍ കേരള ബ്ലാസ്‌റ്റേഴ്‌സിന് വൈദ്യ സംബന്ധമായ എല്ലാ പിന്തുണയും നല്‍കാനാകുമെന്ന് ഞങ്ങള്‍ ഉറച്ചു വിശ്വസിക്കുന്നു. സീസണില്‍ ടീമിന് എല്ലാവിധ വിജയാശംസകളും അറിയിക്കുന്നുവെന്നും അദ്ദേഹം കൂട്ടിച്ചേര്‍ത്തു. തങ്ങളുടെ ആരോഗ്യ പങ്കാളികളായി ഫ്യൂച്ചര്‍എയ്‌സ് ഹോസ്പിറ്റല്‍ എത്തുന്നതില്‍ സന്തോഷമുണ്ടെന്ന് കേരള ബ്ലാസ്‌റ്റേഴ്‌സ് എഫ്‌സി ഡയറക്ടര്‍ നിഖില്‍ ഭരദ്വാജ് പറഞ്ഞു.
'ശാരീരികമായും മാനസികമായും ആരോഗ്യമുള്ളവരായിരിക്കാന്‍, ഞങ്ങളുടെ കളിക്കാര്‍ക്ക് വിദഗ്ധരായ ഡോക്ടര്‍മാരുടെ പിന്തുണയും ഉപദേശവും വളരെ പ്രധാനമാണ്. ഫ്യൂച്ചര്‍ എയ്‌സ് ഹോസ്പിറ്റലുമായുള്ള പങ്കാളിത്തത്തിലൂടെ വരുന്ന ഹീറോ ഐഎസ്എല്‍ സീസണില്‍ ഞങ്ങളുടെ താരങ്ങള്‍ക്ക് കൃത്യമായ വൈദ്യപരിചരണം ഉറപ്പാക്കാന്‍ സാധിക്കുമെന്ന് പ്രതീക്ഷിക്കുന്നുവെന്നും അദ്ദേഹം പറഞ്ഞു.
