കൊച്ചി : മുന്നേറ്റ നിര താരം നോഹ സദൗയിയെ രണ്ട് വര്‍ഷത്തെ കരാറില്‍ ക്ലബ്ബിലെത്തിച്ച് കേരളാ ബ്ലാസ്‌റ്റേഴ്‌സ് എഫ്.സി. 2026 വരെയുള്ള കരാറാണ് താരം ഒപ്പുവെച്ചിരിക്കുന്നത്. ധാരാളം അനുഭവ സമ്പത്തും ഗോള്‍ സ്‌കോറിംഗ് മികവുമുള്ള സദൗയിയുടെ വരവ് ബ്ലാസ്‌റ്റേഴ്‌സിന് കരുത്തു നല്‍കും, ഇത് വരാനിരിക്കുന്ന സീസണുകളില്‍ ക്ലബിന്റെ മുന്നേറ്റ നിരയെ ശക്തിപ്പെടുത്തും.മൊറോക്കോയില്‍ ജനിച്ച നോഹ, വിവിധ ലീഗുകളിലും ഭൂഖണ്ഡങ്ങളിലും തന്റെ കഴിവുകള്‍ പ്രദര്‍ശിപ്പിച്ചുകൊണ്ട് ശ്രദ്ധേയമായ ഒരു ഫുട്‌ബോള്‍ യാത്ര നടത്തിയിട്ടുണ്ട്.
MLS സൈഡ് ന്യൂയോര്‍ക്ക് റെഡ് ബുള്‍സിന്റെ യുവ ടീമായ PDA അക്കാദമിയില്‍ ചേരുന്നതിന് അമേരിക്കയിലേക്ക് പോകുന്നതിന് മുമ്പ്, വൈഡാഡ് കാസബ്ലാങ്കയുടെ യുവനിരയില്‍ നിന്നാണ് അദ്ദേഹത്തിന്റെ കരിയര്‍ ആരംഭിച്ചത്. 2013ല്‍ ഇസ്രായേല്‍ പ്രീമിയര്‍ ലീഗ് ക്ലബ് മക്കാബി ഹൈഫയില്‍ തുടങ്ങി നിരവധി സുപ്രധാന നീക്കങ്ങളിലൂടെയാണ് നോഹയുടെ പ്രൊഫഷണല്‍ കരിയര്‍ ആരംഭിച്ചത്. തുടര്‍ന്ന് മെര്‍ബത്ത് എസ്.സി, എന്‍പ്പി എസ്.സി, എം.സി ഔജ, രാജാ കാസബ്ലാങ്ക, എ.എസ് ഫാര്‍ എന്നീ ക്ലബ്ബുകളില്‍ കളിച്ചിട്ടുണ്ട്. പിന്നീട് 2022 ല്‍ ഐഎസ്എല്‍ ക്ലബ്ബായ എഫ്‌സി ഗോവയില്‍ എത്തി.
30 കാരനായ ഫോര്‍വേഡ് ഐഎസ്എല്ലില്‍ 54 മത്സരങ്ങള്‍ കളിച്ചിട്ടുണ്ട്, കഴിഞ്ഞ രണ്ട് സീസണുകളിലായി 29 ഗോളുകളും 16 അസിസ്റ്റുകളും അദ്ദേഹത്തിന്റെ പേരില്‍ രേഖപ്പെടുത്തിയിടുണ്ട് . താന്‍ കളിച്ച മിക്കവാറും എല്ലാ മത്സരങ്ങളിലും ഒരു ഗോളിന് സംഭാവന നല്‍കിയ നോഹ, ലീഗിലെ ഒരു താരമായും ഐഎസ്എല്ലിലെ ഏറ്റവും ആവേശകരമായ കളിക്കാരിലൊരാളെന്ന നിലയിലും അതിവേഗം പ്രശസ്തിയിലേക്ക് ഉയര്‍ന്നു.2021ല്‍ ദേശീയ ടീമില്‍ അരങ്ങേറ്റം കുറിച്ചതിനു ശേഷം രാജ്യത്തിനായി 4 മത്സരങ്ങള്‍ കളിച്ചിട്ടുണ്ട് . 2021 ആഫ്രിക്കന്‍ നേഷന്‍സ് ചാമ്പ്യന്‍ഷിപ്പിന്റെ സെമിഫൈനലുകളിലും ഫൈനലുകളിലും കളിച്ച് ,മൊറോക്കോയെ കിരീടത്തിലേക്ക് എത്തിക്കാനും അദ്ദേഹം സഹായിച്ചു.
കിരീടമെന്ന ലക്ഷ്യത്തിലെത്താന്‍ നോഹ കേരള ബ്ലാസ്റ്റേഴ്‌സിനൊപ്പം ചേര്‍ന്നതില്‍ അതിയായ സന്തോഷമുണ്ടെന്ന് സ്‌പോര്‍ട്ടിങ് ഡയറക്ടര്‍ കരോലിസ് സ്‌കിന്‍കിസ് പറഞ്ഞു. ഞങ്ങളുടെ ടീമിലെ ഏറ്റവും പ്രധാനപ്പെട്ട കളിക്കാരില്‍ ഒരാളും കഴിഞ്ഞ രണ്ട് ഐഎസ്എല്‍ സീസണുകളിലേതുപോലെ ലീഗിലെ ഏറ്റവും മികച്ച കളിക്കാരില്‍ ഒരാളുമാകുമെന്ന് ഞങ്ങള്‍ പ്രതീക്ഷിക്കുന്നുവെന്നും അദ്ദേഹം പറഞ്ഞു.
കേരള ബ്ലാസ്‌റ്റേഴ്‌സില്‍ ചേരുന്നതില്‍ താന്‍ വളരെ ആവേശത്തിലാണെന്ന് നോഹ സദൗയി പറഞ്ഞു. ബ്ലാസ്‌റ്റേഴ്‌സ് ആരാധകരില്‍ നിന്നുള്ള ഊര്‍ജവും പിന്തുണയും കേവലം അവിശ്വസനീയമാണ്, അവര്‍ക്ക് മുന്നില്‍ കളിക്കാനായും ക്ലബ്ബിന്റെ വിജയത്തിന് സംഭാവന നല്‍കാനും ഈ ആവേശകരമായ യാത്രയുടെ ഭാഗമാകാനും ഞാന്‍ കാത്തിരിക്കുകയാണെന്നും അദ്ദേഹം വ്യക്തമാക്കി.
ഈ സമ്മര്‍ ട്രാന്‍സ്ഫറില്‍ ക്ലബ്ബിന്റെ ആദ്യ വിദേശ സൈനിംഗാണ് നോഹ സദൗയി. തായ്‌ലന്‍ഡില്‍ ജൂലൈ 3 മുതല്‍ വരാനിരിക്കുന്ന സീസണിനായുള്ള പ്രീസീസണ്‍ തയ്യാറെടുപ്പുകള്‍ക്കായി നോഹ ടീമിനൊപ്പം ചേരും.
