3-April-2023 -
By. sports desk
കൊച്ചി: ഹീറോ സൂപ്പര്‍ കപ്പ് 2023നുള്ള ഔദ്യോഗിക ടീമിനെ കേരള ബ്ലാസ്‌റ്റേഴ്‌സ് എഫ്‌സി, പ്രഖ്യാപിച്ചു. ജെസല്‍ കര്‍ണെയ്‌റോ നയിക്കുന്ന 29 അംഗ ടീമില്‍ ബ്ലാസ്റ്റേഴ്സിന്റെ നെടുംതൂണായ അഡ്രിയാന്‍ ലൂണയില്ല.ഏപ്രില്‍ എട്ടിന് കോഴിക്കോട് ഇഎംഎസ് സ്‌റ്റേഡിയത്തില്‍ ഐലീഗ് ചാമ്പ്യന്‍മാരായ റൗണ്ട് ഗ്ലാസ് പഞ്ചാബിനെതിരെയാണ് കേരള ബ്ലാസ്റ്റേഴ്സിന്റെ ആദ്യ മത്സരം. വ്യക്തിപരമായ കാരണങ്ങളാലാണ് അഡ്രിയാന്‍ ലൂണയ്ക്ക് അവധി നല്‍കിയതിനാലാണ് അദ്ദേഹം സൂപ്പര്‍ കപ്പില്‍ പങ്കെടുക്കാത്തതെന്നാണ് ക്ലബ്ബിന്റെ വിശദീകരണം. അതേസമയം, ലൂണ ഒഴികെയുള്ള ടീമിലെ മറ്റ് വിദേശ താരങ്ങളെല്ലാം ഐഎസ്എല്‍ ഇടവേളയ്ക്ക് ശേഷം ടീമിനൊപ്പം പരിശീലനം പുനരാരംഭിച്ചിട്ടുണ്ട്. പ്രാദേശിക യുവ പ്രതിഭകളെയും ടീമില്‍ ഉള്‍പ്പെടുത്തിയിട്ടുണ്ട്. യൂത്ത് റാങ്കിലൂടെ ഒന്നാം ടീമിലേക്ക് കളിക്കാരെ വളര്‍ത്തിയെടുക്കുയെന്ന കാഴ്ച്ചപ്പാടും ഇതുവഴി കേരള ബ്ലാസ്‌റ്റേഴ്‌സ് ശക്തമായി തുടരുന്നു.
കിരീടം ലക്ഷ്യമിട്ടാണ് തങ്ങള്‍ ഹീറോ സൂപ്പര്‍ കപ്പിനിറങ്ങുന്നതെന്ന് കേരള ബ്ലാസ്‌റ്റേഴ്‌സ് സ്‌പോര്‍ട്ടിങ് ഡയറക്ടര്‍ കരോലിസ് സ്‌കിന്‍കിസ് പറഞ്ഞു. ഇന്ത്യന്‍ സൂപ്പര്‍ ലീഗിന് തൊട്ടുപിന്നാലെ മറ്റൊരു ടൂര്‍ണമെന്റിനായി ടീം പൂര്‍ണമായും തയ്യാറാണ്. വിദേശ താരങ്ങള്‍ക്കൊപ്പം നിശ്ചയദാര്‍ഢ്യമുള്ള പ്രാദേശിക പ്രതിഭകള്‍ ടീമിനെ എല്ലാ അര്‍ത്ഥത്തിലും സമ്പൂര്‍ണമാക്കും, അവരുടെ പ്രകടനത്തില്‍ ഞങ്ങള്‍ക്ക് ആത്മവിശ്വാസമുണ്ടെന്നും കരോലിസ് സ്‌കിന്‍കിസ് കൂട്ടിച്ചേര്‍ത്തു. 29 അംഗ ടീമില്‍ 11 താരങ്ങള്‍ മലയാളികളാണ്. രാഹുല്‍ കെ പി, സഹല്‍ അബ്ദുള്‍ സമദ്, ശ്രീക്കുട്ടന്‍ എം എസ്, സച്ചിന്‍ സുരേഷ്, നിഹാല്‍ സുധീഷ്, വിബിന്‍ മോഹനന്‍, ബിജോയ് വര്‍ഗീസ്, മുഹമ്മദ് അസ്ഹര്‍, മുഹമ്മദ് ഐമെന്‍, മുഹമ്മദ് സഹീഫ്, തേജസ് കൃഷ്ണ എന്നിവരാണ് ടീമിലെ മലയാളി താരങ്ങള്‍. ഓസ്‌ട്രേലിയന്‍ സ്‌ട്രൈക്കര്‍ അപ്പോസ്തലോസ് ജിയാനു ആണ് ടീമിലെ ഏക ഇന്റര്‍നാഷണല്‍ ഏഷ്യന്‍ താരം.
ഗോള്‍കീപ്പര്‍മാര്‍: പ്രഭ്‌സുഖന്‍ സിങ് ഗില്‍, കരണ്‍ജിത് സിങ്, സച്ചിന്‍ സുരേഷ്, മുഹീത് ഷബീര്‍.
പ്രതിരോധ താരങ്ങള്‍: വിക്ടര്‍ മോംഗില്‍, മാര്‍ക്കോ ലെസ്‌കോവിച്ച്, ഹോര്‍മിപം റൂയിവ, സന്ദീപ് സിങ്, ബിജോയ് വര്‍ഗീസ്, നിഷു കുമാര്‍, ജെസല്‍ കര്‍ണെയ്‌റോ, മുഹമ്മദ് സഹീഫ്, തേജസ് കൃഷ്ണ.
മധ്യനിര താരങ്ങള്‍: ഡാനിഷ് ഫാറൂഖ്, ആയുഷ് അധികാരി, ജീക്‌സണ്‍ സിങ്, ഇവാന്‍ കല്യൂഷ്‌നി, മുഹമ്മദ് അസ്ഹര്‍, വിബിന്‍ മോഹനന്‍.
മുന്നേറ്റ താരങ്ങള്‍: ബ്രയാന്‍ മിറാന്‍ഡ, സൗരവ് മണ്ഡല്‍, രാഹുല്‍ കെ.പി., സഹല്‍ അബ്ദുല്‍ സമദ്, നിഹാല്‍ സുധീഷ്, ബിദ്യാസാഗര്‍ സിങ്, ശ്രീക്കുട്ടന്‍ എം എസ്., മുഹമ്മദ് ഐമെന്‍, ദിമിത്രിയോസ് ഡയമന്റകോസ്, അപ്പോസ്തലോസ് ജിയാനു എന്നിങ്ങനെയാണ് കേരള ബ്ലാസ്റ്റേഴ്സിന്റെ സ്‌ക്വാഡ്‌
