അത്‌ലറ്റിക്‌സ്, ഷോട്ട് പുട്ട്, സോഫ്റ്റ്‌ബോള്‍ ത്രോ, റോളര്‍ സ്‌കേറ്റിംഗ്, നീന്തല്‍, ബാഡ്മിന്റണ്‍ എന്നീ ഇനങ്ങളില്‍ 16 സംസ്ഥാനങ്ങളില്‍ നിന്നായി 200 ഓളം പേരാണ് ഗെയിംസില്‍ പങ്കെടുക്കുന്നത്.
കൊച്ചി: ഡൗണ്‍ സിന്‍ഡ്രോം ഫെഡറേഷന്‍ ഓഫ് ഇന്ത്യ (ഡിഎസ്എഫ് ഐ), ദി ഡൗണ്‍ സിന്‍ഡ്രോം ട്രസ്റ്റ് (ദോസ്ത്), സ്‌പെഷ്യല്‍ ഒളിമ്പിക്‌സ് ഭാരത് കേരള ഘടകം എന്നിവയുടെ സംയുക്ത ആഭിമുഖ്യത്തില്‍ ഡൗണ്‍സിന്‍ഡ്രോം അവസ്ഥയിലുള്ള എട്ട് വയസിനു മുകളില്‍ പ്രായമുള്ള കുട്ടികള്‍ക്കും മുതിര്‍ന്നവര്‍ക്കുമായി സംഘടിപ്പിക്കുന്ന മൂന്നാമത് ഡൗണ്‍ സിന്‍ഡ്രോം ദേശീയ ഗെയിംസിന് കൊച്ചിയില്‍ തുടക്കമായി. എറണാകുളം കടവന്ത്ര റീജ്യണല്‍ സ്‌പോര്‍ടസ് സെന്ററില്‍ രണ്ടു ദിവസമായി നടക്കുന്ന ഗെയിംസിന് വിവിധ സംസ്ഥാനങ്ങളെ പ്രതിനിധീകരിച്ചെത്തിയ മല്‍സരാര്‍ഥികളുടെ മാര്‍ച്ച് പാസ്‌റ്റോടെയായിരുന്നു ആരംഭം കുറിച്ചത്.
കൊച്ചി മേയര്‍ അഡ്വ. എം. അനില്‍കുമാര്‍ ഗെയിംസ് ഉദ്ഘാടനം ചെയ്തു. ഡൗണ്‍ സിന്‍ഡ്രോം ട്രസ്റ്റ് ചെയര്‍മാനും ദോസ്ത് സപ്പോര്‍ട്ട് ഗ്രൂപ്പ് കേരള പ്രസിഡന്റുമായ ഡോ.ഷാജി തോമസ് ജോണ്‍ അധ്യക്ഷത വഹിച്ചു. ഡൗണ്‍ സിന്‍ഡ്രോം ഫെഡറേഷന്‍ ഓഫ് ഇന്ത്യ പ്രസിഡന്റ് ഡോ. സുരേഖ രാമചന്ദ്രന്‍ മുഖ്യ അതിഥിയായിരുന്നു. സ്‌പെഷ്യല്‍ ഒളിമ്പിക്‌സ് ഭാരത് പ്രോഗ്രാം മാനേജര്‍ സിസ്റ്റര്‍. റാണി ജോ മല്‍സരാര്‍ഥികള്‍ക്കുള്ള പ്രതിജ്ഞ ചൊല്ലിക്കൊടുത്തു.
സ്‌പെഷ്യല്‍ ഒളിമ്പിക്‌സ് ഭാരത് റീജ്യണല്‍ ഡയറക്ടര്‍ ഫാ. റോയ് കണ്ണഞ്ചിറ, ദോസ്ത് സപ്പോര്‍ട്ട് ഗ്രൂപ്പ് കേരള സെക്രട്ടറി നസ്രിന്‍ അഗ്ഫ തുടങ്ങിയവര്‍ സംസാരിച്ചു. അത്‌ലറ്റിക്‌സ്, ഷോട്ട് പുട്ട്, സോഫ്റ്റ്‌ബോള്‍ ത്രോ, റോളര്‍ സ്‌കേറ്റിംഗ്, നീന്തല്‍, ബാഡ്മിന്റണ്‍ എന്നീ ഇനങ്ങളില്‍ 16 സംസ്ഥാനങ്ങളില്‍ നിന്നായി 200 ഓളം പേരാണ് ഗെയിംസില്‍ പങ്കെടുക്കുന്നത്. അത്‌ലറ്റികസ്, നീന്തല്‍, ബാഡ്മിന്റണ്‍ എന്നീ ഇനങ്ങളാണ് ആദ്യം ദിനം നടന്നത്. ഷോട്ട് പുട്ട്, സോഫ്റ്റ്‌ബോള്‍ ത്രോ, റോളര്‍ സ്‌കേറ്റിംഗ് എന്നീ ഇനങ്ങളാണ് നാളെ (ഫെബ്രുവരി 09) നടക്കുക.
