പരിപാടിയുടെ ആലോചനാഘട്ടം മുതല്‍ നടപ്പാക്കല്‍ വരെയുള്ള എല്ലാ ഘട്ടങ്ങളിലും സുരക്ഷയുടെ കാര്യത്തില്‍ യാതൊരുവിധ കുറവുകളും ഉണ്ടാകില്ലെന്ന ഇ.എം.എ.കെ അംഗങ്ങളുടെ കൂട്ടായ പ്രതിജ്ഞയാണ് ‘ഇവന്റ് സേഫ്’ പദ്ധതി
കൊച്ചി: സംസ്ഥാനത്തെ എല്ലാ പരിപാടികളിലും സുരക്ഷ ഉറപ്പാക്കുന്നതിനായി ‘ഇവന്റ് സേഫ്’ എന്ന പേരില്‍ ജാഗ്രതാപദ്ധതിയുമായി ഇവന്റ് മാനേജ്‌മെന്റ് അസോസിയേഷന്‍ കേരള (ഇ.എം.എ.കെ). ഏത് പരിപാടിയിലും സുരക്ഷാ മാനദണ്ഡങ്ങളില്‍ വിട്ടുവീഴ്ച പാടില്ലെന്ന നിലപാടാണ് അസോസിയേഷന്‍ ആവര്‍ത്തിക്കുന്നത്. പരിപാടിയുടെ ആലോചനാഘട്ടം മുതല്‍ നടപ്പാക്കല്‍ വരെയുള്ള എല്ലാ ഘട്ടങ്ങളിലും സുരക്ഷയുടെ കാര്യത്തില്‍ യാതൊരുവിധ കുറവുകളും ഉണ്ടാകില്ലെന്ന ഇ.എം.എ.കെ അംഗങ്ങളുടെ കൂട്ടായ പ്രതിജ്ഞയാണ് ‘ഇവന്റ് സേഫ്’ പദ്ധതി. അടുത്തിടെ പൊതുപരിപാടിക്കിടെയുണ്ടായ നിര്‍ഭാഗ്യകരമായ സംഭവങ്ങളുടെ പശ്ചാത്തലത്തിലാണ് പുതിയ പദ്ധതി രൂപീകരിച്ചിരിക്കുന്നത് .പൊതുജനങ്ങളും ക്ലയന്റുകളും വിവിധയിനം പരിപാടികളില്‍ പങ്കെടുക്കുന്നവരും ഇ.എം.എ.കെയില്‍ അര്‍പ്പിച്ചിരിക്കുന്ന ഒരു വിശ്വാസമുണ്ട്.
ആ വിശ്വാസം കാത്തുസൂക്ഷിക്കാനായി പരമാവധി സുരക്ഷ ഉറപ്പാക്കുമെന്ന് ദൃഢനിശ്ചയമാണ് ഈ പദ്ധതിയെന്ന് ഇ.എം.എ.കെ പ്രസിഡന്റ് രാജു കണ്ണമ്പുഴ പറഞ്ഞു. ഓരോ പരിപാടിയും എല്ലാവര്‍ക്കും സുരക്ഷിതമായി ആഘോഷിക്കാനാവുന്ന ഒന്നായിരിക്കുമെന്ന ഉറപ്പ് പാലിക്കാന്‍, എല്ലാ സംഘാടകര്‍ക്കും കൂട്ടായ ഉത്തരവാദിത്വമുണ്ടെന്നും അദ്ദേഹം പറഞ്ഞു.പദ്ധതി നടപ്പിലാകുന്നതോടെ എല്ലാ പരിപാടിയിലും സുരക്ഷാമാനദണ്ഡങ്ങള്‍ മുന്‍പത്തേക്കാളേറെ ശക്തമാകും. ഇതിനായുള്ള പരിശോധനകള്‍ കര്‍ശനമാക്കും. അപകടങ്ങളും അനിഷ്ടസംഭവങ്ങളും ഒഴിവാക്കുന്നതിനായി സംഘാടകര്‍ക്ക് ആവശ്യമായ പരിശീലനവും നല്‍കും. ഏറ്റവും പുതിയ സുരക്ഷാമാനദണ്ഡങ്ങളായിരിക്കും പഠിപ്പിക്കുക. ഇതിനായി അധികൃതര്‍ നല്‍കുന്ന നിര്‍ദേശങ്ങള്‍ കൃത്യമായി പിന്തുടരും. പരിപാടിയുടെ ഭാഗമാകുന്ന എല്ലാവരോടും സുതാര്യമായ ഇടപെടലുകളും ആശയവിനിമയവും ഉറപ്പാക്കും.
പാലിക്കേണ്ട സുരക്ഷാമാനദണ്ഡങ്ങള്‍ സംബന്ധിച്ച് ചുമതലപ്പെട്ട അധികൃതര്‍ക്ക് വിശദമായ ഒരു രൂപരേഖ സമര്‍പ്പിക്കാനും ആലോചനയുണ്ട്.2009 ജൂലൈ ഒന്നിനാണ് ഇവന്റ് മാനേജ്‌മെന്റ് അസോസിയേഷന്‍ കേരള (ഇ.എം.എ.കെ) സ്ഥാപിതമാകുന്നത്. കേരളത്തിലെ വിവിധ ഇവന്റ് മാനേജ്‌മെന്റ് ഏജന്‍സികളെ പ്രതിനിധാനം ചെയ്യുന്ന ഏക സംഘടനയാണിത്. ദേശീയതലത്തില്‍ പ്രവര്‍ത്തിക്കുന്ന ഇവന്റ് ആന്‍ഡ് എന്റര്‍ടൈന്‍മെന്റ് മാനേജ്‌മെന്റ് അസോസിയേഷന്‍ (ഇ.ഇ.എം.എ) ന്റെ അംഗീകാരത്തോടെ സംസ്ഥാനത്ത് പ്രവര്‍ത്തിക്കുന്ന സംഘടനയാണ് ഇ.എം.എ.കെ.
