സംസ്ഥാനത്തെ ചെറുതും വലുതുമായ ഭക്ഷ്യസംസ്‌കരണ സ്ഥാപനങ്ങള്‍ക്കാവശ്യമായ ഭക്ഷ്യോല്‍പ്പന്ന മെഷീനറി, പാക്കേജിംഗ് ഉപകരണങ്ങള്‍, ചേരുവകള്‍ തുടങ്ങിയ മേഖലകളില്‍ നിന്നുള്ള 200ലേറെ സ്ഥാപനങ്ങള്‍ മേളയില്‍ ഉല്‍പ്പന്നങ്ങളും സേവനങ്ങളും പ്രദര്‍ശിപ്പിക്കും.
കൊച്ചി: സംസ്ഥാനത്തെ പ്രമുഖ ഭക്ഷ്യ സംസ്കരണ, പാക്കേജിംഗ് പ്രദര്‍ശനമായ ഫുഡ്‌ടെക് കേരളയുടെ പതിനാറാം പതിപ്പ് മെയ് 22 മുതല്‍ 24 വരെ കൊച്ചി ജവഹര്‍ ലാല്‍ നെഹ്രു സ്‌റ്റേഡിയത്തില്‍ നടക്കും. 22നു രാവിലെ 11ന് മന്ത്രി പി രാജീവ് ഉദ്ഘാടനം ചെയ്യും. സംസ്ഥാനത്തെ ചെറുതും വലുതുമായ ഭക്ഷ്യസംസ്‌കരണ സ്ഥാപനങ്ങള്‍ക്കാവശ്യമായ ഭക്ഷ്യോല്‍പ്പന്ന മെഷീനറി, പാക്കേജിംഗ് ഉപകരണങ്ങള്‍, ചേരുവകള്‍ തുടങ്ങിയ മേഖലകളില്‍ നിന്നുള്ള 200ലേറെ സ്ഥാപനങ്ങള്‍ മേളയില്‍ ഉല്‍പ്പന്നങ്ങളും സേവനങ്ങളും പ്രദര്‍ശിപ്പിക്കും. ഹോട്ടല്‍ടെക് പ്രദര്‍ശനവും ഇതോടൊപ്പം നടക്കുമെന്ന് സംഘാടകര്‍ വാര്‍ത്താ സമ്മേളനത്തില്‍ അറിയിച്ചു. ഭക്ഷ്യ സംസ്‌കരണത്തിലും പാക്കേജിംഗ് മേഖലയിലും ഏര്‍പ്പെട്ടിരിക്കുന്ന സ്ഥാപനങ്ങള്‍ക്കും അവരുടെ ഉല്‍പ്പന്നങ്ങളും സേവനങ്ങളും പ്രദര്‍ശിപ്പിക്കുന്നതിന് മേള വേദിയൊരുക്കുമെന്ന് സംഘാടകരായ ക്രൂസ് എക്‌സ്‌പോസ് ഡയറക്ടര്‍ ജോസഫ് കുര്യാക്കോസ് പറഞ്ഞു. കേരള ബ്യൂറോ ഓഫ് ഇന്‍ഡസ്ട്രിയല്‍ പ്രൊമോഷന്‍ (കെബിപ്), നബാര്‍ഡ്, എന്‍എസ്‌ഐസി, സിഐഎഫ്ടി, നോര്‍ക്കറൂട്ട്‌സ് എന്നിവയുടെ അംഗീകാരവും പിന്തുണയും പ്രദര്‍ശനത്തിനുണ്ട്. പിഎംപിഎഫ്ഇ സ്‌കീമിന് കീഴിലുള്ള 104 സ്റ്റാളുകളായിരിക്കും ഈ വര്‍ഷത്തെ പതിപ്പിന്റെ പ്രധാന ആകര്‍ഷണം.
അതില്‍ കേരളത്തില്‍ നിന്നുള്ള ഭക്ഷ്യ സംസ്കരണ യൂണിറ്റുകളില്‍ നിന്നുള്ള സ്റ്റാളുകളുമുണ്ടായിരിക്കുന്നതാണ്. ഭക്ഷ്യ സംസ്കരണ, പാക്കേജിംഗ് ഉപകരണ വിതരണക്കാരുടെയും ഭക്ഷ്യ സംസ്‌കരണക്കാരുടെയും ഉപഭോക്താക്കളുടെയും സാന്നിധ്യം എക്‌സ്‌പോയ്ക്ക് ഒരു പുതിയ മാനം നല്‍കുമെന്നും ്പ്രാദേശിക ഉപഭോക്താക്കളെയും ദേശീയ വിതരണക്കാരെയും മേള ഒരൊറ്റ പ്ലാറ്റ്‌ഫോമില്‍ ഒരുമിച്ച് കൊണ്ടുവരുമെന്നും ജോസഫ് കുര്യാക്കോസ് പറഞ്ഞു.പ്രദര്‍ശനത്തിന്റെ ഭാഗമായി ബംഗ്ലൂര്‍ ആസ്ഥാനമായ കോഫി ബോര്‍ഡ് സംഘടിപ്പിക്കുന്ന കേരള ബാരിസ്റ്റ വര്‍ക്ക്‌ഷോപ്പ് മെയ് 20 മുതല്‍ 24 വരെ വെന്യു പാര്‍ട്ണറായ ചാവറ ഇന്‍സ്റ്റിറ്റിയൂട്ടില്‍ നടക്കും. ഫ്രെഷ് ആന്റ് ഹോണസ്റ്റ് ആണ് ഈ പരിപാടിയുടെ എക്വിപ്‌മെന്റ് പാര്‍ട്ണര്‍. കോഫി നിര്‍മാണത്തിലെ നൂതന പ്രവണതകള്‍ അവതരിപ്പിക്കുന്ന ഇത്തരമൊരു വര്‍ക്ക്‌ഷോപ്പ് സംസ്ഥാനത്ത് ഇതാദ്യമായാണ് അരങ്ങേറുന്നത്.
ഈ വര്‍ഷത്തെ ഹോട്ടല്‍ടെക് കേരള പതിപ്പില്‍ 200ലധികം പ്രദര്‍ശകര്‍ അവരുടെ ഉല്‍പ്പന്നങ്ങളും സേവനങ്ങളും പ്രദര്‍ശിപ്പിക്കും. എക്‌സ്‌പോയുടെ രണ്ടാം ദിവസം നടക്കുന്ന ജിഎം കോണ്‍ക്ലേവ് & പര്‍ച്ചേസ് മാനേജേഴ്‌സ് മീറ്റായിരിക്കും ഈ പതിപ്പിന്റെ പ്രധാന ആകര്‍ഷണം.കേരളത്തില്‍ നിന്നുള്ള ഹോട്ടലുകളിലും റിസോര്‍ട്ടുകളിലും നിന്നുള്ള ജിഎംമാരും പര്‍ച്ചേസ് മാനേജര്‍മാരും ഒത്തുചേര്‍ന്ന് കേരളത്തിലെ വ്യവസായത്തിന്റെ നിലവിലെ അവസ്ഥയെക്കുറിച്ച് ചര്‍ച്ച ചെയ്യും. ഷെഫ്‌സ് മീറ്റ്, ഹൗസ് കീപ്പേഴ്‌സ് മീറ്റ് എന്നിവയും ഇതോടൊപ്പം നടക്കും.സംസ്ഥാനത്തിന്റെ സാമ്പത്തിക വികസനത്തില്‍ ഹൊറേക്ക മേഖല ഒരു പ്രധാന പങ്ക് വഹിക്കുന്നുണ്ടെന്ന് ജോസഫ് കുര്യാക്കോസ് പറഞ്ഞു.സ്‌റ്റോള്‍ മെഷീനറി കണ്ട്രി ഹെഡ് മോഹന്‍ കുരുവിള, പൂനെ ഗ്യാസ് പ്രതിനിധി ഋഷി മേനോന്‍ ഡിഐസി ജിഎം നജീബ് എന്നിവരും വാര്‍ത്താസമ്മേളനത്തില്‍ പങ്കെടുത്തു
