ഈസ്‌റ്റേണിന്റെ വളര്‍ച്ചയുടെ മേല്‍നോട്ടത്തോടൊപ്പം ഓര്‍ക്കല ഇന്ത്യയുടെ കേരളത്തിലെ സാന്നിധ്യം വര്‍ധിപ്പിക്കുക എന്ന ഉത്തരവാദിത്തമാണ് പുതിയ സി ഇ ഒ യില്‍ നിക്ഷിപ്തമായിരിക്കുന്നത്.
കൊച്ചി: ഓര്‍ക്കല ഇന്ത്യയുടെ ഈസ്‌റ്റേണ്‍ ബിസിനസ് യൂണിറ്റിന്റെ കേരള സി ഇ ഒ ആയി ഗിരീഷ് കുമാര്‍ നായരെ നിയമിച്ചു. നോര്‍വിജിയന്‍ വ്യവസായ നിക്ഷേപ സ്ഥാപനമായ ഓര്‍ക്കല എ എസ് എയുടെ ഇന്ത്യന്‍ വിഭാഗമായ ഓര്‍ക്കല ഇന്ത്യയാണ് ഈസ്‌റ്റേണ്‍ ഏറ്റെടുത്തിട്ടുള്ളത്. ഈസ്‌റ്റേണിന്റെ വളര്‍ച്ചയുടെ മേല്‍നോട്ടത്തോടൊപ്പം ഓര്‍ക്കല ഇന്ത്യയുടെ കേരളത്തിലെ സാന്നിധ്യം വര്‍ധിപ്പിക്കുക എന്ന ഉത്തരവാദിത്തമാണ് പുതിയ സി ഇ ഒ യില്‍ നിക്ഷിപ്തമായിരിക്കുന്നത്.
മൂന്ന് പതിറ്റാണ്ടോളം ഭക്ഷ്യ ഉപഭോക്തൃ ഉത്പന്നങ്ങളുടെ വിപണന മേഖലയില്‍ പരിചയമുണ്ട് ഗിരീഷ് കുമാര്‍ നായര്‍ക്ക്. ഒലാം ഗ്രൂപ്പില്‍ നിന്നാണ് ഈസ്‌റ്റേണിലേക്ക് അദ്ദേഹം എത്തുന്നത്. ഐ ഐ ടി മദ്രാസ്, ഐ ഐ എം ബംഗളുരു എന്നിവടങ്ങളിലായിരുന്നു വിദ്യാഭ്യാസം. വിപ്രോ, ബക്കാര്‍ഡി, ബ്രിട്ടാനിയ, ഡാബര്‍ എന്നിവിടങ്ങളില്‍ അദ്ദേഹം ജോലി ചെയ്തിട്ടുണ്ട്.ഈസ്‌റ്റേണിനെ വളര്‍ച്ചയുടെ പുതുവഴിയിലേക്ക് നയിക്കാന്‍ ശേഷിയും പരിചയസമ്പത്തുമുള്ളയാളാണ് ഗിരീഷ് കുമാര്‍ നായര്‍ എന്ന് ഓര്‍ക്കല ഇന്ത്യ സി ഇ ഒ സഞ്ജയ് ശര്‍മ്മ പറഞ്ഞു.ഈസ്‌റ്റേണിനൊപ്പം ജോലി ചെയ്യാന്‍ കഴിയുന്നതില്‍ സന്തോഷമുണ്ടെന്നും കാലത്തിനനുസരിച്ചുള്ള മാറ്റത്തിന്റെ വഴിയിലേക്ക് ടീമിനെ നയിക്കാനാണ് ലക്ഷ്യമെന്നും ഗിരീഷ് കുമാര്‍ നായര്‍ പറഞ്ഞു.
