ഓരോ തവണയും ഓരോ സ്‌പെഷ്യലാണ്. മനസ്സും വയറും നിറയ്ക്കുന്ന രീതിയില്‍ ഭക്ഷണ രുചികള്‍ ഒരുക്കും, എന്നാല്‍ സ്പെഷ്യല് വിഭവം ഏതെന്ന് ഇപ്പോള്‍ പറയുന്നില്ല, ഭക്ഷണം കഴിച്ചു മനസിലാക്കട്ടെയെന്ന് പഴയിടം പറഞ്ഞു.
തിരുവനന്തപുരം: സംസ്ഥാന സ്‌കൂള്‍ കലോത്സവത്തിന് ഇത്തവണവും രുചിമേളം ഒരുക്കി പഴയിടം മോഹനന്‍ നമ്പൂതിരി. ഭക്ഷണപ്പുരയുടെ പാലുകാച്ചലിന് എത്തിയ മന്ത്രിമാരായ വി ശിവന്‍കുട്ടി, ജി ആര്‍ അനില്‍, മറ്റ് വിശിഷ്ടാതിഥികള്‍, മാധ്യമപ്രവര്‍ത്തകര്‍ എന്നിവര്‍ക്ക് തന്റെ സ്പെഷ്യല് പായസം നല്‍കി പഴയിടം കര്‍മ്മനിരതനായി. മുന്‍ വര്‍ഷത്തില്‍ നിന്നും വ്യത്യസ്തമായിരിക്കും ഇത്തവണത്തെ രുചികള്‍. ഓരോ തവണയും ഓരോ സ്‌പെഷ്യലാണ്. മനസ്സും വയറും നിറയ്ക്കുന്ന രീതിയില്‍ ഭക്ഷണ രുചികള്‍ ഒരുക്കും, എന്നാല്‍ സ്പെഷ്യല് വിഭവം ഏതെന്ന് ഇപ്പോള്‍ പറയുന്നില്ല, ഭക്ഷണം കഴിച്ചു മനസിലാക്കട്ടെയെന്ന് പഴയിടം പറഞ്ഞു.
2006 ലെ സംസ്ഥാന സ്‌കൂള്‍ കലോത്സവം മുതല്‍ പഴയിടം മോഹനന്‍ നമ്പൂതിരിയും കൂട്ടരുമാണ് ഭക്ഷണപ്പുരയുടെ ചുമതല വഹിക്കുന്നത്. സംസ്ഥാന സ്‌കൂള്‍ കായികമേളയ്ക്ക് 14 തവണയും സ്‌കൂള്‍ ശാസ്ത്രമേളയ്ക്ക് 15 തവണയും പഴയിടം ഭക്ഷണം ഒരുക്കിയിട്ടുണ്ട്.ഭക്ഷണപ്പുരയില്‍ ദിവസവും നാല്‍പ്പതിനായിരം പേര്‍ക്ക് ഭക്ഷണമൊരുക്കും. രാത്രിയിലെ അത്താഴം മുതല്‍ ഭക്ഷണശാല പ്രവര്‍ത്തനസജ്ജമാകും.
മൂന്ന് നേരവും ഭക്ഷണമുണ്ടാകും. പതിനായിരം പേര്‍ക്ക് പ്രഭാത ഭക്ഷണവും ഇരുപതിനായിരം പേര്‍ക്ക് ഉച്ചഭക്ഷണവും പതിനായിരം പേര്‍ക്കുള്ള അത്താഴവും ഭക്ഷണപ്പുരയില്‍ തയ്യാറാക്കും. മൂന്ന് നേരവും ഇലയിലാണ് ഭക്ഷണം നല്‍കുന്നത്. വ്യത്യസ്തമായ പ്രഭാത ഭക്ഷണമാണ് ഓരോ ദിവസവും നല്‍കുക. ഉച്ചയ്ക്കുള്ള സദ്യയ്ക്ക് പന്ത്രണ്ടു കറികളും പായസവുമുണ്ട്. തിരുവനന്തപുരം ജില്ലയിലെ സ്‌കൂളുകളില്‍നിന്ന് സമാഹരിച്ച ഭക്ഷ്യവിഭവങ്ങള്‍ കഴിഞ്ഞ ദിവസം ഭക്ഷണപ്പുരയില്‍ എത്തിച്ചിട്ടുണ്ട്.
ഭക്ഷണപ്പുരയുടെ സജ്ജീകരണങ്ങളില്‍ പൂര്‍ണ്ണമായും തൃപ്തനാണെന്ന് പഴയിടം പറഞ്ഞു. എല്ലാ ജില്ലകളില്‍ നിന്നുമുള്ളവര്‍ക്ക് ഇഷ്ടപെടുന്ന രുചികളാവും ഉണ്ടാവുക. അതിനായി നല്ലൊരു മെനു ഒരുക്കിയിട്ടുണ്ട്.
പുത്തരിക്കണ്ടം മൈതാനത്ത് തയ്യാറാക്കിയിട്ടുള്ള നെയ്യാര്‍ പന്തലില്‍ ഒരേ സമയം 4,000 പേര്‍ക്ക് ഇരുന്ന് ഭക്ഷണം കഴിക്കാന്‍ സൗകര്യമുണ്ട്. 200 പേര്‍ക്ക് ഇരിക്കാവുന്ന 20 നിരകളാണ് ക്രമീകരിച്ചിട്ടുള്ളത്. അദ്ധ്യാപകരും വിദ്യാര്‍ത്ഥികളും സ്‌കൗട്ട് ആന്‍ഡ് ഗൈഡ് അംഗങ്ങളുമുള്‍പ്പടെ 350 പേര്‍ ഭക്ഷണം വിളമ്പാനുണ്ട്. അദ്ധ്യാപക സംഘടനയായ കേരള സ്‌കൂള്‍ ടീച്ചേര്‍സ് അസോസിയേഷനാണ് ഭക്ഷണ കമ്മിറ്റിയുടെ പൊതു ചുമതല.
