ജനന രജിസ്‌ട്രേഷനുകള്‍ രണ്ടര ലക്ഷത്തോളം മരണ രജിസ്‌ട്രേഷനുകള്‍ ഒന്നര ലക്ഷത്തോളം
തിരുവനന്തപുരം: ഡിജിറ്റല്‍ ഗവേണന്‍സിന്റെ മുഖമായ കെ സ്മാര്‍ട് ആപ്ലിക്കേഷനിലൂടെ ജനന രജിസ്‌ട്രേഷന്‍, ജനന സര്‍ട്ടിഫിക്കറ്റിലെ തിരുത്ത്, വൈകിയ ജനന അപേക്ഷകള്‍ എന്നിവകള്‍ക്കായി ഇതുവരെ സമര്‍പ്പിക്കപ്പെട്ടത് 692696 അപേക്ഷകള്‍. ഇതില്‍ 599103 അപേക്ഷകള്‍ തീര്‍പ്പാക്കി കഴിഞ്ഞു. ആകെ സമര്‍പ്പിക്കപ്പെട്ട അപേക്ഷകളുടെ 96.27 ശതമാനമാണിതെന്ന് കെ സ്മാര്‍ട്ട് പ്രിന്‍സിപ്പല്‍ സെക്രട്ടറിയും മാനേജിംഗ് ഡയറക്ടറുമായ സന്തോഷ് ബാബു ഐഎഎസ് പറഞ്ഞു.
ഏറ്റവും കൂടുതല്‍ ജനന രജിസ്‌ട്രേഷന്‍ അപേക്ഷകള്‍ സ്വീകരിക്കപ്പെട്ടിരിക്കുന്നത് കോഴിക്കോട് കോര്‍പ്പറേഷനിലാണ്. ആകെ 26111 അപേക്ഷകളാണ് ജില്ലയില്‍ രജിസ്റ്റര്‍ ചെയ്യപ്പെട്ടിട്ടുള്ളത്. ഇതില്‍ 98 ശതമാനവും, അതായത് 25770 അപേക്ഷകളും തീര്‍പ്പാക്കി. തിരുവനന്തപുരം കോര്‍പ്പറേഷനില്‍ ആകെ 25747 ജനന രജിസ്‌ട്രേഷന്‍ അപേക്ഷകള്‍ കെ സ്മാര്‍ട് വഴി രജിസ്റ്റര്‍ ചെയ്തു. ഇതില്‍ 25649 അപേക്ഷകള്‍ തീര്‍പ്പാക്കിക്കഴിഞ്ഞു. തൃശൂര്‍ കോര്‍പ്പറേഷനില്‍ 11623 അപേക്ഷകളാണ് സ്വീകരിക്കപ്പെട്ടത്. ഇതില്‍ 11571 അപേക്ഷകള്‍ തീര്‍പ്പാക്കി. കൊച്ചി കോര്‍പ്പറേഷനില്‍ 11487 അപേക്ഷകള്‍ രജിസ്റ്റര്‍ ചെയ്തപ്പോള്‍ അതില്‍ 11429 എണ്ണമാണ് തീര്‍പ്പാക്കിയത്. കോട്ടക്കല്‍ മുനിസിപ്പാലിറ്റിയില്‍ 9942 ആപേക്ഷകള്‍ വന്നതില്‍ 9935 അപേക്ഷകള്‍ തീര്‍പ്പാക്കി. പെരിന്തല്‍മണ്ണ മുനിസിപ്പാലിറ്റിയില്‍ 9134 ജനന രജിസ്‌ട്രേഷന്‍ അപേക്ഷകളാണ് കെ സ്മാര്‍ടിലൂടെ സമര്‍പ്പിക്കപ്പെട്ടത്. ഇതില്‍ 9132 അപേക്ഷകള്‍ തീര്‍പ്പാക്കി. മഞ്ചേരി മുനിസിപ്പാലിറ്റിയില്‍ 8492 അപേക്ഷകള്‍ രജിസ്റ്റര്‍ ചെയ്യപ്പെട്ടപ്പോള്‍ അതില്‍ 8485 അപേക്ഷകള്‍ ഇതിനോടകം തീര്‍പ്പാക്കിക്കഴിഞ്ഞു.
കൊല്ലം കോര്‍പ്പറേഷനില്‍ ഇതുവരെ ആകെ 7638 അപേക്ഷകളാണുണ്ടായിട്ടുള്ളത്. ഇതില്‍ 7601 അപേക്ഷകള്‍ക്ക് അംഗീകാരം നല്‍കി. കാസര്‍കോട് മുനിസിപ്പാലിറ്റിയില്‍ ആകെ 7230 അപേക്ഷകള്‍ സ്വീകരിക്കപ്പെട്ടു. ഇതില്‍ 7226 അപേക്ഷകള്‍ തീര്‍പ്പാക്കിക്കഴിഞ്ഞു. മലപ്പുറം മുനിസിപ്പാലിറ്റിയില്‍ ആകെ സ്വീകരിക്കപ്പെട്ട 7074 അപേക്ഷകളില്‍ 7070 അപേക്ഷകളും തീര്‍പ്പാക്കി.ഇതുവരെ ആകെ 145149 മരണവുമായി ബന്ധപ്പെട്ട അപേക്ഷകളാണ് കെ സ്മാര്‍ട് മുഖേന സ്വീകരിക്കപ്പെട്ടിട്ടുള്ളത്. ഇതില്‍ 132095 അപേക്ഷകള്‍ അനുവദിക്കപ്പെട്ടുകഴിഞ്ഞു. 138142 മരണ രജിസ്‌ട്രേഷന്‍ അപേക്ഷകള്‍ ലഭിച്ചതില്‍ 132095 സര്‍ട്ടിഫിക്കറ്റുകള്‍ അനുവദിക്കുകയും 7146 മരണ സര്‍ട്ടിഫിക്കറ്റ് തിരുത്തല്‍ അപേക്ഷകളിലെ 4496 എണ്ണം നല്‍കുകയും ചെയ്തു.
1272 വൈകിയ മരണ സര്‍ട്ടിഫിക്കറ്റിനുള്ള അപേക്ഷകള്‍ ലഭിച്ചതില്‍ 4496 അപേക്ഷകള്‍ തീര്‍പ്പാക്കി. ആകെ അപേക്ഷകളുടെ 91 ശതമാനമാണിത്.ഉദ്യോഗസ്ഥര്‍ക്ക് വീടുകളില്‍ നിന്നുപോലും ഫയലുകള്‍ കൈകാര്യം ചെയ്യുവാന്‍ സാധിക്കുമെന്നതിനാല്‍ അപേക്ഷകള്‍ തീര്‍പ്പാക്കുന്നതിലുള്ള വേഗം വലിയ രീതിയില്‍ കൂടിയിട്ടുണ്ട്. അപേക്ഷകള്‍ അപ്രൂവല്‍ ലഭിച്ചാലുടന്‍ സര്‍ട്ടിഫിക്കറ്റ് വാട്‌സ്ആപ്പില്‍ ലഭ്യമാകുന്ന തരത്തിലും സര്‍ട്ടിഫിക്കറ്റിലെ ക്യു.ആര്‍ കോഡ് സ്‌കാന്‍ ചെയ്താല്‍ നേരിട്ട് കെസ്മാര്‍ട്ട് വെബ്‌സൈറ്റിലേക്ക് പോയി വെരിഫൈ ചെയ്യാനുമുള്ള സൗകര്യം ഒരുക്കിയിട്ടുണ്ട്. ഉദ്യോഗസ്ഥര്‍ കൃത്യസമയത്ത് സേവനം നല്‍കുന്നുണ്ട് എന്ന് ഉറപ്പാക്കാനും കെ സ്മാര്‍ടിലൂടെ സാധിക്കും. ജോലിഭാരം കുറയുന്നതിനാല്‍ ജീവനക്കാര്‍ക്ക് മറ്റ് ഭരണ നിര്‍വ്വഹണ കാര്യങ്ങളില്‍ അവരുടെ കാര്യശേഷി ഉപയോഗപ്പെടുത്താനും കഴിയുമെന്നും സന്തോഷ് ബാബു് പറഞ്ഞു. സുതാര്യത ഉറപ്പ് വരുത്തി ഫയല്‍ നീക്കം വേഗത്തിലായി എന്നതാണ് കെ സ്മാര്‍ട്ട് സവിശേഷതയെന്നും അദ്ദേഹം കൂട്ടിച്ചേര്‍ത്തു.
