ആന്റി-സബ്‌മറൈൻ യുദ്ധക്കപ്പൽ ‘അമിനി’ ഇന്ത്യൻ നാവികസേനയ്ക്ക് കൈമാറി

കൊച്ചി:തദ്ദേശീയ കപ്പൽ നിർമ്മാണ രംഗത്ത് മറ്റൊരു നാഴികക്കല്ല് കുറിച്ചുകൊണ്ട് ഗാർഡൻ റീച്ച് ഷിപ്പ്ബിൽഡേഴ്സ് ആൻഡ് എഞ്ചിനീയേഴ്സ് (GRSE) നിർമ്മിച്ച ആന്റി-സബ്‌മറൈൻ വാർഫെയർ ഷാലോ വാട്ടർ ക്രാഫ്റ്റ് (ASW SWC) ‘അമിനി’ 2026 നവംബർ 05-ന് ഇന്ത്യൻ നാവികസേനയ്ക്ക് കൈമാറി. ഇന്ത്യൻ രജിസ്റ്റർ ഓഫ് ഷിപ്പിങ്ങിന്റെ (IRS) വർഗ്ഗീകരണ നിയമങ്ങൾക്ക് അനുസൃതമായാണ് കൊൽക്കത്ത ആസ്ഥാനമായ ജിആർഎസ്ഇ ഈ യുദ്ധക്കപ്പൽ രൂപകൽപ്പന ചെയ്ത് നിർമ്മിച്ചത്. വാട്ടർജെറ്റ് പ്രൊപ്പൽഷൻ സംവിധാനത്തിൽ പ്രവർത്തിക്കുന്ന ഇന്ത്യൻ നാവികസേനയുടെ ഏറ്റവും വലിയ യുദ്ധക്കപ്പലുകളിൽ ഒന്നാണ് അമിനി.

അത്യാധുനിക ലൈറ്റ്‌വെയ്റ്റ് ടോർപ്പിഡോകൾ, തദ്ദേശീയ റോക്കറ്റ് ലോഞ്ചറുകൾ, സോണാറുകൾ എന്നിവ സജ്ജീകരിച്ചിരിക്കുന്ന ഈ കപ്പൽ അന്തർവാഹിനി ഭീഷണികളെ ഫലപ്രദമായി ചെറുക്കാനും, തീരദേശ നിരീക്ഷണത്തിനും, മൈൻ ലേയിങ്ങിനും നാവികസേനയുടെ ശേഷി വൻതോതിൽ വർദ്ധിപ്പിക്കും. ലക്ഷദ്വീപിലെ ‘അമിനി’ ദ്വീപിന്റെ പേരിൽ നിന്നാണ് കപ്പലിന് ഈ നാമകരണം ലഭിച്ചത്. 2002-ൽ സേവനത്തിൽ നിന്ന് വിരമിച്ച പഴയ ഐഎൻഎസ് അമിനിയുടെ ഓർമ്മകൾ പുതുക്കുന്നതാണ് പുതിയ കപ്പൽ. 80 ശതമാനത്തിലധികം തദ്ദേശീയ ഘടകങ്ങൾ ഉൾപ്പെടുത്തി നിർമ്മിച്ച അമിനി, ‘ആത്മനിർഭർ ഭാരത്’ ലക്ഷ്യങ്ങൾ കൈവരിക്കുന്നതിൽ രാജ്യത്തിന്റെ മുന്നേറ്റത്തെ വ്യക്തമാക്കുന്നു.