കൊച്ചി: ഇന്ത്യൻ നാവികസേനയും സിംഗപ്പൂർ നാവികസേനയും (RSN) സംയുക്തമായി സംഘടിപ്പിക്കുന്ന ‘സിംബെക്സ്-2026’ (SIMBEX-2026) നാവികസേനാ അഭ്യാസത്തിന്റെ 33-ാമത് എഡിഷൻ വിശാഖപട്ടണത്ത് ആരംഭിച്ചു. ഒക്ടോബർ 21 മുതൽ 26 വരെയാണ് അഭ്യാസം നടക്കുന്നത്. പരിശീലനത്തിൽ പങ്കെടുക്കുന്നതിനായി സിംഗപ്പൂർ നാവികസേനാ കപ്പലായ ആർ.എസ്.എസ് സുപ്രീം (RSS Supreme) ഒക്ടോബർ 21-ന് വിശാഖപട്ടണം തുറമുഖത്തെത്തി.
ഒക്ടോബർ 21-ന് ഇന്ത്യൻ നാവികസേനാ കപ്പലുകളായ ഐ.എൻ.എസ് നീലഗിരി, ഐ.എൻ.എസ് കമോർത്ത എന്നിവയിൽ വെച്ചാണ് ഉദ്ഘാടന ചടങ്ങുകൾ നടന്നത്. ഈസ്റ്റേൺ നേവൽ കമാൻഡ് ചീഫ് സ്റ്റാഫ് ഓഫീസർ (ഓപ്പറേഷൻസ്), സിംഗപ്പൂർ നാവികസേനാ ഫ്ലീറ്റ് കമാൻഡർ, ഇരു രാജ്യങ്ങളിലെയും മുതിർന്ന ഉദ്യോഗസ്ഥർ എന്നിവർ ചടങ്ങിൽ പങ്കെടുത്തു.
1994-ൽ ‘എക്സർസൈസ് ലയൺ കിംഗ്’ എന്ന പേരിൽ ആരംഭിച്ച സിംബെക്സ്, ഇന്ന് ഇരു രാജ്യങ്ങളും തമ്മിലുള്ള തന്ത്രപ്രധാനമായ നാവിക പങ്കാളിത്തമായി വളർന്നിട്ടുണ്ട്. ഹാർബർ ഫേസ് (ഒക്ടോബർ 21-23), സീ ഫേസ് (ഒക്ടോബർ 24-26) എന്നിങ്ങനെ രണ്ട് ഘട്ടങ്ങളായാണ് ഇത്തവണത്തെ അഭ്യാസം. ബംഗാൾ ഉൾക്കടലിൽ നടക്കുന്ന സീ ഫേസിൽ അന്തർവാഹിനി വിരുദ്ധ പോരാട്ടങ്ങൾ (ASW), ആന്റി-സർഫേസ്, ആന്റി-എയർ വാർഫെയർ ഡ്രില്ലുകൾ, സങ്കീർണ്ണമായ നാവിക നീക്കങ്ങൾ എന്നിവ നടക്കും.
