ന്യൂഡൽഹി : ഇന്ത്യൻ വ്യോമസേനയുടെ ഡയറക്ടർ ജനറൽ മെഡിക്കൽ സർവീസസ് (DGMS – Air) ആയി എയർ മാർഷൽ വിവേക് ഹാന്ഡെ (എ.വി.എസ്.എം, വി.എസ്.എം) 2026 സെപ്റ്റംബർ 1-ന് ചുമതലയേറ്റു. പുണെ ആംഡ് ഫോഴ്സസ് മെഡിക്കൽ കോളേജ് (AFMC), മുംബൈ ടാറ്റാ മെമ്മോറിയൽ ഹോസ്പിറ്റൽ, ന്യൂഡൽഹി നാഷണൽ ഡിഫൻസ് കോളേജ് എന്നിവിടങ്ങളിലെ പൂർവ്വവിദ്യാർത്ഥിയായ അദ്ദേഹം 1988 ഡിസംബറിലാണ് സൈനിക സേവനത്തിൽ പ്രവേശിക്കുന്നത്. രാജ്യത്തെ പ്രമുഖ ഗ്യാസ്ട്രോഎന്ററോളജിസ്റ്റുകളിൽ ഒരാളായ എയർ മാർഷൽ വിവേക് ഹാന്ഡെ, തന്റെ ദീർഘകാല ഔദ്യോഗിക ജീവിതത്തിൽ നിരവധി നിർണായക വിദഗ്ധ-ഭരണനിർവ്വഹണ പദവികൾ വഹിച്ചിട്ടുണ്ട്.
ഇന്ത്യൻ പ്രതിരോധ സേനയുടെ മൂന്ന് വിഭാഗങ്ങളിലും (കര, നാവിക, വ്യോമസേനകൾ) സേവനമനുഷ്ഠിക്കാൻ സാധിച്ചു എന്നത് അദ്ദേഹത്തിന്റെ സേവന ജീവിതത്തിലെ അപൂർവ്വമായ നേട്ടമാണ്. ഫ്ലാഗ് ഓഫീസർ പദവിയിൽ ഇന്ത്യൻ നേവൽ ഹോസ്പിറ്റൽ ഷിപ്പ് (INHS) അശ്വിനിയുടെ കമാൻഡറായും തുടർന്ന് സീനിയർ കൺസൾട്ടന്റ് (മെഡിസിൻ) പദവിയിലും അദ്ദേഹം സേവനമനുഷ്ഠിച്ചിട്ടുണ്ട്. പുതിയ ചുമതലയേൽക്കുന്നതിന് മുൻപ്, ഡയറക്ടർ ജനറൽ ആംഡ് ഫോഴ്സസ് മെഡിക്കൽ സർവീസസ് (DGAFMS) ഓഫീസിൽ ഡി.ജി (ഓർഗനൈസേഷൻ & പേഴ്സണൽ) എന്ന സുപ്രധാന തസ്തിക കൈകാര്യം ചെയ്തു വരികയായിരുന്നു അദ്ദേഹം.
