വാസ്തുവിദ്യാ മികവിനപ്പുറം, കൂട്ടായ്മയുടെയും കമ്മ്യൂണിറ്റി ലിവിങ്ങിന്റെയും ആശയത്തിലാണ് ഒളിമ്പസ് പടുത്തുയർത്തിയിരിക്കുന്നത്.
കോഴിക്കോട്: കോഴിക്കോട് ഹൈലൈറ്റ് സിറ്റിയിലെ അത്യാധുനിക ആഡംബര റസിഡൻഷ്യൽ പദ്ധതിയായ ‘ഹൈലൈറ്റ് ഒളിമ്പസി’ലെ ആദ്യ ടവറായ ‘ഒളിമ്പസ് 1’ ഹൈലൈറ്റ് ഗ്രൂപ്പ് ഉപഭോക്താക്കൾക്ക് കൈമാറി. 7.07 ഏക്കറിൽ രൂപകൽപ്പന ചെയ്ത ഈ 33 നില കെട്ടിടത്തിൽ 526 അപ്പാർട്ട്മെന്റുകളാണുള്ളത്. 100-ലധികം ലോകോത്തര സൗകര്യങ്ങളും ടെറസിൽ 40,000-ത്തിലധികം ചതുരശ്ര അടിയിൽ പരന്നുകിടക്കുന്ന വിനോദ ഇടവും ഒരൊറ്റ പാസേജിലൂടെ അപ്പാർട്ട്മെന്റുകളെ ബന്ധിപ്പിക്കുന്ന വേറിട്ട ഡിസൈനുമാണ് ഇതിന്റെ പ്രധാന ആകർഷണം. ഹൈലൈറ്റ് ഗ്രൂപ്പ് ചെയർമാൻ പി. സുലൈമാന്റെ ദീർഘവീക്ഷണത്തിൽ പൂർത്തിയായ ഈ പദ്ധതി, താമസക്കാർക്ക് അന്താരാഷ്ട്ര നിലവാരമുള്ള ആഡംബരത്തോടൊപ്പം സുരക്ഷിതമായ കമ്മ്യൂണിറ്റി ലിവിങ് അനുഭവം ഉറപ്പുനൽകുന്നു. 412 അപ്പാർട്ട്മെന്റുകളുള്ള രണ്ടാമത്തെ ടവറായ ‘ഒളിമ്പസ് 2’-ന്റെ നിർമ്മാണം നിലവിൽ പുരോഗമിക്കുകയാണ്.
ഹൈലൈറ്റ് സൈപ്രസ്, ഹൈലൈറ്റ് പട്രാസ് എന്നീ പദ്ധതികളുടെ വിജയകരമായ പൂർത്തീകരണത്തിനും ചെമ്മാട് ‘ഹൈലൈറ്റ് കൺട്രിസൈഡ്’ ഉദ്ഘാടനത്തിനും തൊട്ടുപിന്നാലെയാണ് ഒളിമ്പസ് 1-ന്റെ കൈമാറ്റം. ഹൈലൈറ്റ് മാൾ, ഹൈലൈറ്റ് ബിസിനസ് പാർക്ക്, പലാക്സി സിനിമാസ്, ഹഗ് എ മഗ് തുടങ്ങിയ വൈവിധ്യമാർന്ന സൗകര്യങ്ങളിലേക്ക് നേരിട്ട് പ്രവേശനമുള്ള മിക്സഡ്-യൂസ് ഡെവലപ്പ്മെന്റായ ഹൈലൈറ്റ് സിറ്റിക്കുള്ളിലാണ് ഇത് സ്ഥിതി ചെയ്യുന്നത്. നഗരജീവിതത്തിന്റെ സങ്കൽപ്പങ്ങളെ മാറ്റിയെഴുതുന്ന വാസ്തുവിദ്യാ മികവും ഉയർന്ന ജീവിതനിലവാരവും മലബാറിലെ ഉപഭോക്താക്കൾക്ക് ലഭ്യമാക്കുകയാണ് ഇതിലൂടെ ലക്ഷ്യമിടുന്നതെന്ന് ഹൈലൈറ്റ് ഗ്രൂപ്പ് സിഇഒ അജിൽ മുഹമ്മദും ഹൈലൈറ്റ് ബിൽഡേഴ്സ് സിഇഒ മുഹമ്മദ് ഫസീമും വ്യക്തമാക്കി.
