കൊച്ചി: പ്രമുഖ ഡിജിറ്റൽ പേയ്മെന്റ് പ്ലാറ്റ്ഫോമായ പേടിഎമ്മും പ്രമുഖ ഓമ്നിചാനൽ ജ്വല്ലറി ബ്രാൻഡായ കാരറ്റ്ലെയ്നും സഹകരിച്ച് പേടിഎം പ്ലാറ്റ്ഫോമിൽ ആഭരണങ്ങൾ വാങ്ങുന്നതിനുള്ള സൗകര്യം അവതരിപ്പിച്ചു. ഇതോടെ കാരറ്റ്ലെയ്നിന്റെ വൈവിധ്യമാർന്ന ആഭരണ ശേഖരം ഉപഭോക്താക്കൾക്ക് പേടിഎം വഴി നേരിട്ട് വാങ്ങാനാകും. മോതിരങ്ങൾ, കമ്മലുകൾ, പെൻഡന്റുകൾ, നെക്ലേസുകൾ, വളകൾ, ബ്രേസ്ലെറ്റുകൾ തുടങ്ങി വിവിധ വിഭാഗങ്ങളിലുള്ള ആഭരണങ്ങളാണ് പ്ലാറ്റ്ഫോമിൽ ലഭ്യമാകുക.
പേടിഎം യുപിഐ, ക്രെഡിറ്റ് കാർഡ്, ഡെബിറ്റ് കാർഡ്, നെറ്റ് ബാങ്കിംഗ് തുടങ്ങിയ വിവിധ പേയ്മെന്റ് മാർഗങ്ങളിലൂടെ ഉപഭോക്താക്കൾക്ക് കാരറ്റ്ലെയ്ൻ ആഭരണങ്ങൾ വാങ്ങാം. പേടിഎം ഡിജിറ്റൽ ഗോൾഡ് ഉപയോഗിച്ചും ആഭരണങ്ങൾ സ്വന്തമാക്കാനുള്ള സൗകര്യം ഒരുക്കിയിട്ടുണ്ട്. ഡിജിറ്റൽ ഗോൾഡിന്റെ മൂല്യം ഉപയോഗിച്ച ശേഷം ബാക്കി അടയ്ക്കേണ്ട തുക മറ്റ് ലഭ്യമായ പേയ്മെന്റ് മാർഗങ്ങളിലൂടെ നൽകാനും സാധിക്കും.
കാരറ്റ്ലെയ്ൻ സേവനം ലഭ്യമായ പിൻകോഡുകളിലെ ഉപഭോക്താക്കൾക്ക് ഓർഡറുമായി ബന്ധപ്പെട്ട പാക്കേജിംഗ്, ഓർഡർ പൂർത്തീകരണം, ഹോം ഡെലിവറി തുടങ്ങിയ സേവനങ്ങൾ കാരറ്റ്ലെയ്ൻ തന്നെ കൈകാര്യം ചെയ്യും. ഓർഡർ സ്ഥിരീകരണം, ഓർഡർ ട്രാക്കിംഗ്, വാങ്ങലുമായി ബന്ധപ്പെട്ട മറ്റ് വിവരങ്ങൾ എന്നിവ പേടിഎം പ്ലാറ്റ്ഫോമിലൂടെ ഉപഭോക്താക്കൾക്ക് ലഭ്യമാകും. പേയ്മെന്റ് സൗകര്യവും ആഭരണ ഷോപ്പിംഗും ഒരൊറ്റ ഡിജിറ്റൽ പ്ലാറ്റ്ഫോമിൽ സംയോജിപ്പിക്കുന്നതിലൂടെ ഉപഭോക്താക്കൾക്ക് കൂടുതൽ സൗകര്യപ്രദമായ ഷോപ്പിംഗ് അനുഭവം നൽകുകയാണ് സഹകരണത്തിന്റെ ലക്ഷ്യം.
