കേരളത്തില് വേനല്ക്കാലം ശക്തമാകുന്നതോടെ ചൂട് മൂലമുള്ള ആരോഗ്യപ്രശ്നങ്ങളും വര്ധിക്കുന്നതായി ആരോഗ്യരംഗത്ത് പ്രവര്ത്തിക്കുന്നവര് മുന്നറിയിപ്പ് നല്കുന്നു. ശരീരത്തിലെ ജലാംശം കുറഞ്ഞതോടെ ക്ഷീണം, തലവേദന, ചൂടേറ്റുപോകല് (ഒലമ േേെൃീസല), ത്വക്ക് പ്രശ്നങ്ങള് എന്നിവ സാധാരണയായി കണ്ടുവരുന്നു. ഈ സാഹചര്യത്തില് വ്യക്തിഗത മുന്കരുതലുകള്ക്കൊപ്പം ഹോമിയോപ്പതിയും സഹായകരമാകുന്നു.
വേനല്ക്കാലത്ത് ഏറ്റവും പ്രധാനമായി ശ്രദ്ധിക്കേണ്ടത് ശരിയായ ജലസേവനമാണ്. ദിവസേന മതിയായ അളവില് വെള്ളം കുടിക്കുന്നതോടൊപ്പം തേങ്ങാവെള്ളം, നാരങ്ങാവെള്ളം, മോര് തുടങ്ങിയവ ഉള്പ്പെടുത്തുന്നത് ശരീരത്തിലെ ഇലക്ട്രോളൈറ്റ് നില നിലനിര്ത്താന് സഹായിക്കുന്നു. ചൂട് കൂടുതലുള്ള സമയങ്ങളില് പുറത്തിറങ്ങുന്നത് പരമാവധി ഒഴിവാക്കുകയും, ലഘുവായ വസ്ത്രങ്ങള് ധരിക്കുകയും ചെയ്യേണ്ടതാണ്.ഭക്ഷണത്തില് മിതത്വം പാലിക്കുക എന്നത് വേനല്ക്കാലത്ത് അത്യാവശ്യമാണ്. തണ്ണിമത്തന്, വെള്ളരിക്ക പോലുള്ള ജലസാന്ദ്രത കൂടുതലുള്ള ഭക്ഷണങ്ങള് ശരീരത്തെ തണുപ്പിക്കുകയും ശരീരത്തില് വെള്ളത്തിന്റെ അളവ് നില നിര്ത്തുകയും ചെയ്യുന്നു. വ്യക്തിഗത ശുചിത്വം പാലിക്കുന്നത് ത്വക്ക് രോഗങ്ങള് ഒഴിവാക്കാന് സഹായിക്കുന്നു. ഹോമിയോപ്പതിയില് വേനല്ക്കാലവുമായി ബന്ധപ്പെട്ട പല പ്രശ്നങ്ങള്ക്കും ഫലപ്രദമായ ചികിത്സകള് ലഭ്യമാണ്. ചൂട് മൂലമുള്ള ക്ഷീണം, തലവേദന, അതിയായ ദാഹം, ശരീരത്തിലെ ജലക്ഷയം തുടങ്ങിയ ലക്ഷണങ്ങള് ഉണ്ടായാല് രോഗിയുടെ വ്യക്തിഗത ലക്ഷണങ്ങളെ അടിസ്ഥാനമാക്കി അനുയോജ്യമായ ഔഷധങ്ങള് തിരഞ്ഞെടുക്കുന്നു. ഉദാഹരണത്തിന്, അമിത ദാഹവും ക്ഷീണവും ഉള്ളവര്ക്ക് അനുയോജ്യമായ മരുന്നുകളും, സൂര്യാഘാതം മൂലമുള്ള തലവേദനക്കും ശരീരവേദനക്കും പ്രത്യേകമായി നിര്ദ്ദേശിക്കുന്ന മരുന്നുകളും ഹോമിയോപ്പതിയില് ഉണ്ട്.
ചൊറിച്ചില്, ചൂടുകുരു, അലര്ജി തുടങ്ങിയവക്കും ഹോമിയോപ്പതി നല്ല ഫലങ്ങള് നല്കുന്ന ചികിത്സാരീതിയാണ്. പ്രധാനമായും, രോഗിയുടെ ശരീരഘടനയും മാനസികാവസ്ഥയും പരിഗണിച്ച് ചികിത്സ നല്കുന്നു എന്നതാണ് ഹോമിയോപ്പതിയുടെ പ്രത്യേകത.വേനല്ക്കാല ആരോഗ്യസംരക്ഷണത്തില് മുന്കരുതലുകള്ക്കും, ജീവിതശൈലി നിയന്ത്രണത്തിനും ഒപ്പം ഹോമിയോപ്പതി ചികിത്സയും ഉള്പ്പെടുത്തുന്നത് ആരോഗ്യകരമായ ജീവിതത്തിനുള്ള നല്ല മാര്ഗമാണ്. ഈ വിഷയത്തില് പൊതുജനങ്ങള് കൂടുതല് ബോധവല്ക്കരണം നല്കേണ്ടത് അത്യാവശ്യമാണ്.
ലേഖനം തയ്യാറാക്കിയത്
ഡോ. എ. നസ്റിന്
ഇന്ത്യന് ഹോമിയോപതിക് മെഡിക്കല് അസോസിയേഷന് സംസ്ഥാന വുമണ്സ് വിംഗ് ചെയര്പേഴ്സണ്
