കൊച്ചി: കൊച്ചി ഇന്റര്‍നാഷണല്‍ എന്‍ എഫ് ആര്‍ ഫിലിം ഫെസ്റ്റിവല്‍ വെബ്‌സൈറ്റിന്റെ ഉദ്ഘാടനം ചലച്ചിത്രനടനും സംവിധായകനുമായ പൃഥ്വിരാജ് സുകുമാരന്‍ നിര്‍വഹിച്ചു.ഫെസ്റ്റിവല്‍ ഡയറക്ടര്‍ ഡോ. ജെയ്ന്‍ ജോസഫ്, എക്‌സിക്യൂട്ടീവ് ഡയറക്ടര്‍ ലിയോ തദ്ദേവൂസ് എന്നിവര്‍ ചടങ്ങില്‍ സന്നിഹിതരായിരുന്നു. ധര്‍മ്മം, നീതി, സന്തോഷം എന്നീ വിഷയങ്ങള്‍ പ്രമേയമാക്കി സംഘടിപ്പിച്ചിരിക്കുന്ന ഫെസ്റ്റിവലിനും ഈ സംരംഭത്തില്‍ പങ്കെടുക്കുന്ന നവ സംവിധായകര്‍ക്കും, സാങ്കേതിക വിദഗ്ധര്‍ക്കും, ക്രിയേറ്റീവ് ആളുകള്‍ക്കും എല്ലാവിധ വിജയങ്ങളും പൃഥ്വിരാജ് ആശംസിച്ചു.
മൂന്നു മാസം നീണ്ടുനില്‍ക്കുന്ന ഫെസ്റ്റിവലില്‍ ഗ്ലോബല്‍ ഫിലിം പിച്ച് ഫെസ്റ്റിവല്‍, ഇന്‍ഡസ്ട്രി ഇന്‍വെസ്‌റ്റേഴ്‌സ് ഇന്‍ക്യുബേറ്റര്‍, ഗ്ലോബല്‍ ഫിലിം കോണ്‍ക്ലേവ്‌സ് തുടങ്ങിയ ഏഴ് വ്യത്യസ്ത ശൃംഖലകള്‍ മേളയില്‍ ഉള്‍പ്പെടുത്തിയിട്ടുണ്ട്. കല, സംസ്‌കാരം, സിനിമാറ്റിക് മികവ് എന്നിവയില്‍ നടക്കുന്ന മൂന്ന് ദിവസത്തെ ഗ്രാന്റ് സമ്മിറ്റോടെ ഫെസ്റ്റിവല്‍ സമാപിക്കും. യുവ തലമുറക്കും സിനിമയെ സ്‌നേഹിക്കുന്നവര്‍ക്കും മഹത്തായ അവസരമായിരിക്കും ഈ ഫെസ്റ്റിവലെന്ന് ചെയര്‍മാന്‍ സിബി മലയില്‍ അറിയിച്ചു.
