കൊച്ചി :  കേന്ദ്ര ടൂറിസം മന്ത്രാലയത്തിന്റെ ആഭിമുഖ്യത്തില്‍ ഇന്ത്യ ടീ ബോര്‍ഡ് സംഘടിപ്പിച്ച ' ടീ ചാംപ്യന്‍ഷിപ്പില്‍ മികച്ച ചായ ഒരുക്കി ഹൈദരാബാദ് സ്വദേശിനി പ്രഭ ഒന്നാം സമ്മാനം ഒരു ലക്ഷം രൂപ കരസ്ഥമാക്കി. ഹൈദരാബാദിലെ നോവോടെലിലെ എച്ച്‌ഐസിസിയില്‍  ഒരുക്കിയ ടീ ചാംപ്യന്‍ഷിപ്പിന്റെ രണ്ടാം പതിപ്പില്‍  200 ലധികം വനിതകളാണ് പങ്കെടുത്തത്. രണ്ടാം സമ്മാനമായ 50,000 രൂപ പൊട്‌ലുരി മാധവി കരസ്ഥമാക്കിയപ്പോള്‍ മൂന്നാം സമ്മാനമായ 25,000 രൂപ സീതം രജു നാഗ കമല നേടി. മല്‍സരത്തില്‍ മികച്ച പ്രകടനം കാഴ്ചവെച്ച അഞ്ച് പേര്‍ 10,000 രൂപ വീതം പ്രോല്‍സാഹന സമ്മാനവും നേടി. കേന്ദ്ര ടൂറിസം മന്ത്രി ജി.കിഷന്‍ റെഡ്ഡി വിജയികള്‍ക്ക് സമ്മാനങ്ങള്‍ വിതരണം ചെയ്തു. ചായ കുടിച്ചുകൊണ്ടാണ് നമ്മളില്‍ പലരുടെയും ദിവസം ആരംഭിക്കുന്നതെന്നും നിത്യ ജീവിതത്തില്‍ നേരിടുന്ന സമ്മര്‍ദ്ദങ്ങളെ അതിജീവിക്കാന്‍ ചായ നല്ലൊരു ഉപാധിയാണെന്നും കേന്ദ്ര മന്ത്രി ജി.കിഷന്‍ റെഡ്ഡി പറഞ്ഞു. ടീ ബോര്‍ഡ് ഡെപ്യൂട്ടി ഡയറക്ടര്‍ ഫല്‍ഗുനി ബാനര്‍ജി, ഹൈബിസ് ഗ്രൂപ്പ് എം.ഡി എം.രാജ്‌ഗോപാല്‍, സി.ഇ.ഒ സന്ധ്യാറാണി, നില്‍ഗിരി ടീ എംപോറം മാനേജിംഗ് പാര്‍ട്ണര്‍ ധര്‍വേശ് അനീസ് അഹമ്മദ് തുടങ്ങിയവരും ചടങ്ങില്‍ പങ്കെടുത്തു.