കൊച്ചി: പ്രൊഫ. എം കെ സാനു ചെയര്‍മാനായി പ്രവര്‍ത്തിക്കുന്ന ഫെയ്‌സ് ഫൗണ്ടേഷന്‍ വിഷുവിന് തെരുവോരങ്ങളില്‍ അന്തി ഉറങ്ങുന്നവര്‍ക്കും സാധുക്കള്‍ക്കുമായി ഐശ്വര്യത്തിന്റെയും സമൃദ്ധിയുടെയും വിഷുക്കണി ഒരുക്കിയും വിഷു കൈനീട്ടവും സമൃദ്ധമായ വിഷു സദ്യയും നല്‍കി. ഗാന്ധിനഗറിലെ ഫെയ്‌സ് ഊട്ടുപുരയില്‍ നടന്ന ചടങ്ങ് മുന്‍ കേന്ദ്ര മന്ത്രി പ്രൊഫ: കെ. വി തോമസ് ഉദ്ഘാടനം ചെയ്തു.
ഫെയ്‌സ് ഒരുക്കിയ ചടങ്ങില്‍ അദ്ദേഹം എല്ലാവര്‍ക്കും വിഷു കൈനേട്ടം നല്‍കിയശേഷം സദ്യയും വിളമ്പിക്കൊടുത്തു. പഴയകാല വിഷുദിന ഓര്‍മ്മകള്‍ പങ്കുവെച്ച തോമസ് മാഷ് അവര്‍ക്കൊപ്പം ഊണ് കഴിക്കുകയും ചെയ്തു. ഫെയ്‌സ് മാനേജിംഗ് ട്രസ്റ്റി ടി.ആര്‍ ദേവന്‍ അധ്യക്ഷത വഹിച്ചു. ടി.വിനയ് കുമാര്‍ ആമുഖ പ്രഭാഷണം നടത്തി. എ. ബി സാബു, എ.എസ്.രാജന്‍, ആര്‍.ഗിരീഷ്, എം.ആര്‍ ആശിഷ് എന്നിവര്‍ സംസാരിച്ചു.
