മീററ്റ്: ഇന്ത്യൻ വ്യോമസേനയുടെ അഭിമാനമായ സൂര്യകിരൺ എയ്റോബാറ്റിക് ടീം (SKAT) ചരിത്രത്തിൽ ആദ്യമായി മീററ്റ് നഗരത്തിന് മുകളിൽ നടത്തിയ വ്യോമാഭ്യാസപ്രകടനം കാണികളിൽ വിസ്മയം തീർത്തു. സെപ്റ്റംബർ 19, 20 വെള്ളി, ശനി ദിവസങ്ങളിലായി നടന്ന രണ്ട് നീണ്ട ദിവസങ്ങളിലെ പ്രകടനങ്ങൾ കാണാൻ വിദ്യാർത്ഥികളും എൻ.സി.സി, എൻ.എസ്.എസ് കേഡറ്റുകളും ഉൾപ്പെടെ ലക്ഷത്തിലധികം ജനങ്ങളാണ് തടിച്ചുകൂടിയത്. മീററ്റ് സ്വദേശികളായ രണ്ട് പൈലറ്റുമാർ ഉൾപ്പെടെ മൂന്ന് പേർ സൂര്യകിരൺ ടീമിൽ അംഗങ്ങളായിട്ടുണ്ട് . സെപ്റ്റംബർ 20-ലെ പ്രകടനം നേരിൽ വീക്ഷിച്ച പ്രതിരോധ സഹമന്ത്രി സഞ്ജയ് സേത്, വ്യോമസേനയുടെ അച്ചടക്കത്തിന്റെയും കൃത്യതയുടെയും മികച്ച പ്രകടനമാണ് സൂര്യകിരൺ കാഴ്ചവെച്ചതെന്ന് എക്സിൽ കുറിച്ചു. കഴിഞ്ഞ 30 വർഷത്തിനിടയിൽ രാജ്യത്തിനകത്തും പുറത്തുമായി 800-ലധികം എയർഷോകൾ വിജയകരമായി പൂർത്തിയാക്കിയ സൂര്യകിരൺ ടീമിന്റെ സേവനങ്ങളെ അദ്ദേഹം അഭിനന്ദിച്ചു. തിളക്കമാർന്ന വർണ്ണങ്ങൾ വാരിവിതറി ആകാശത്ത് വിസ്മയം തീർത്ത പൈലറ്റുമാരുടെ ധീരതയെയും കൃത്യതയെയും ഉത്തർപ്രദേശ് മുഖ്യമന്ത്രി യോഗി ആദിത്യനാഥും പ്രശംസിച്ചു. രാജ്യസഭാ എം.പി ഡോ. ലക്ഷ്മികാന്ത് ബാജ്പേയ്, മന്ത്രി സോമേന്ദ്ര തോമർ തുടങ്ങിയ വരും ചടങ്ങിൽ സന്നിഹിതരായിരുന്നു.
ഹിന്ദുസ്ഥാൻ എയ്റോനോട്ടിക്സ് ലിമിറ്റഡ് (HAL) ഇന്ത്യയിൽ നിർമ്മിച്ച ഒമ്പത് ചുവപ്പും വെള്ളയും നിറത്തിലുള്ള ഹോക്ക് Mk 132 വിമാനങ്ങളാണ് പ്രകടനത്തിനായി ഉപയോഗിച്ചത്. അഞ്ച് മീറ്ററിലധികം മാത്രം അകലത്തിൽ അതീവ കൃത്യതയോടെ വിമാനങ്ങൾ പറത്തിക്കൊണ്ട് നടത്തിയ ലൂപ്പുകൾ, ബാരൽ റോളുകൾ, ആകാശത്ത് ത്രിവർണ്ണ പതാകയുടെ നിറങ്ങൾ തീർത്തുള്ള സ്മോക്ക് സ്റ്റണ്ടുകൾ എന്നിവ കാണികളെ ഏറെ ആവേശം കൊള്ളിച്ചു. നാസിക്കിലെ വ്യോമസേനാ ബേസ് റിപ്പയർ ഡിപ്പോയിൽ തദ്ദേശീയമായി വികസിപ്പിച്ചെടുത്ത പ്രത്യേക സ്മോക്ക് പോഡുകളുടെ സഹായത്തോടെയാണ് ആകാശത്ത് ദേശീയ പതാകയുടെ വർണ്ണങ്ങൾ തീർത്തത്. 1996-ൽ രൂപീകൃതമായ സൂര്യകിരൺ ടീം, ഏഷ്യയിലെ ഏക ഒമ്പത് വിമാനങ്ങളുടെ എയ്റോബാറ്റിക് സ്ക്വാഡ്രൺ എന്ന നിലയിലും വ്യോമസേനയുടെ അംബാസഡർമാർ എന്ന നിലയിലും ലോകമെമ്പാടും ഇന്ത്യയുടെ യശസ്സുയർത്തിവരുന്നു.
