തിരുവനന്തപുരം: കേരളത്തിലെ സെവൻസ് ഫുട്‌ബോളിന്റെ ആഗോള പ്രചാരണത്തിനായി സെവൻസ് ഫുട്‌ബോൾ അസോസിയേഷൻ (എസ്എഫ്എ), സ്‌പോർട്‌വോട്ടുമായി കൈകോർക്കുന്നു. 2026 സീസണിലെ അസോസിയേഷന്റെ 13 ടൂർണമെന്റുകളുടെ ഔദ്യോഗിക തത്സമയ ദൃശ്യനിർമാണ, സ്ട്രീമിങ്, വിതരണ പങ്കാളിയായി സ്‌പോർട്‌വോട്ട് പ്രവർത്തിക്കും. മൾട്ടി-ക്യാമറ സംവിധാനവും മികച്ച ഗ്രാഫിക്‌സും ഉപയോഗിച്ച് മത്സരങ്ങൾ സ്‌പോർട്‌വോട്ട് ആപ്പിലൂടെ മാത്രമായിരിക്കും എക്‌സ്‌ക്ലൂസീവായി സംപ്രേഷണം ചെയ്യുക. ചാപ്റ്റർ വൺ സ്പോർട്സ് പ്രൈവറ്റ് ലിമിറ്റഡിന്റെ ഡയറക്ടറും സഹസ്ഥാപകനുമായ അർണോൾഡ് വില്സന്റെ പിന്തുണയോടെയാണ് ഈ സുപ്രധാന സഹകരണം യാഥാർഥ്യമായത്. ഗ്രൗണ്ടിലെത്താൻ കഴിയാത്ത ആരാധകർക്ക് മത്സരങ്ങൾ കാണാനും കളിക്കാർക്കും ക്ലബ്ബുകൾക്കും അർഹമായ ദൃശ്യപരത ലഭ്യമാക്കാനുമാണ് ഈ പങ്കാളിത്തത്തിലൂടെ ലക്ഷ്യമിടുന്നതെന്ന് സ്‌പോർട്‌വോട്ട് സഹസ്ഥാപകയും ചീഫ് മാർക്കറ്റിങ് ഓഫീസറുമായ ശുഭാംഗി ഗുപ്ത പറഞ്ഞു. ഈ സഹകരണം ടൂർണമെന്റുകളെ പ്രൊഫഷണൽ നിലവാരത്തിലേക്ക് ഉയർത്തുമെന്ന് എസ്എഫ്എ പ്രസിഡന്റ് കെ.എം.ലെനിനും, കളിക്കാർക്ക് കൂടുതൽ അംഗീകാരവും കായികരംഗത്തിന് സാമ്പത്തിക വളർച്ചയും നേടിക്കൊടുക്കുമെന്ന് ജനറൽ സെക്രട്ടറി അഷ്‌റഫ് ബാവയും വ്യക്തമാക്കി.
