കൊച്ചി : ഫേസ് ഫൗണ്ടേഷന്റെ സ്ഥാപക ചെയർമാൻ പ്രൊഫ. എം.കെ. സാനുവിന്റെ 99-ാം ജന്മദിനം കടവന്ത്ര ഗാന്ധിനഗറിലെ ഫേസ് ഫൗണ്ടേഷൻ ആസ്ഥാനത്ത് ആഘോഷിച്ചു. മാനേജിംഗ് ട്രസ്റ്റി ടി.ആർ. ദേവൻ ഭദ്രദീപം തെളിയിച്ച് ചടങ്ങ് ഉദ്ഘാടനം ചെയ്തു. പ്രമുഖ വ്യവസായി ബിജു പാപ്പച്ചൻ മുഖ്യാതിഥിയായി പങ്കെടുത്തു. 2011-ൽ കൊച്ചി നഗരത്തിലെ വിശപ്പകറ്റുക എന്ന ലക്ഷ്യത്തോടെ ജസ്റ്റിസ് വി.ആർ. കൃഷ്ണയ്യർ മുഖ്യരക്ഷാധികാരിയും പ്രൊഫ. എം.കെ. സാനു ചെയർമാനുമായി രൂപീകരിച്ച എൻ.ജി.ഒ ആണ് ഫേസ് ഫൗണ്ടേഷൻ. കഴിഞ്ഞ 16 വർഷത്തിനിടയിൽ 20 ലക്ഷത്തിലധികം ആളുകൾക്ക് സൗജന്യമായി ഭക്ഷണം നൽകാൻ ഈ കേന്ദ്രത്തിന് സാധിച്ചിട്ടുണ്ട്. കൂടാതെ കിടപ്പുരോഗികൾക്കായുള്ള ‘അക്ഷയപാത്രം’ റേഷൻ പദ്ധതിക്ക് പുറമെ വസ്ത്രം, പാർപ്പിടം, വിദ്യാഭ്യാസം തുടങ്ങിയ മേഖലകളിലും ഫേസ് ഫൗണ്ടേഷൻ സജീവമായി പ്രവർത്തിച്ചുവരുന്നു. ചടങ്ങിൽ ഫേസ് ജനറൽ മാനേജർ ടിന്റുമോൾ പ്രദീപ്, ലൈസൺ ഓഫീസർ സിനിൽകുമാർ എന്നിവർ സംസാരിച്ചു.
