ന്യൂഡല്‍ഹി: രാജ്യത്തിന്റെ വികസനത്തിനു നിര്‍ണായകമാകുന്ന ഗവണ്മെന്റ് പദ്ധതികളുടെ തത്സമയ നിരീക്ഷണം സാധ്യമാക്കുന്ന സംയോജിത പ്ലാറ്റ്‌ഫോമായി പ്രവര്‍ത്തിക്കുന്ന ‘പ്രഗതി’ (പ്രോ-ആക്റ്റീവ് ഗവേണന്‍സ് ആന്‍ഡ് ടൈം ഇംപ്ലിമെന്റേഷന്‍) പ്ലാറ്റ്ഫോം, സാങ്കേതികവിദ്യയുടെയും ഭരണനിര്‍വഹണത്തിന്റെയും അത്ഭുതകരമായ സംയോജനമാണെന്ന് അന്താരാഷ്ട്ര പഠനം. ഓക്സ്ഫഡ് സര്‍വകലാശാലയി?ലെ സെയ്ദ് ബിസിനസ് സ്‌കൂളും ഗേറ്റ്സ് ഫൗണ്ടേഷനും പ്രസിദ്ധീകരിച്ച ‘സ്തംഭനത്തില്‍നിന്നു വളര്‍ച്ചയിലേക്ക്: നേതൃത്വം എങ്ങനെ ഇന്ത്യയുടെ പ്രഗതി ആവാസവ്യവസ്ഥയെ മുന്നോട്ടുനയിക്കുന്നു’ എന്ന ശീര്‍ഷകത്തിലുള്ള പഠനമാണ് ‘പ്രഗതി’ സംരംഭത്തിന്റെ ശ്രദ്ധേയ വിജയം അനാവരണം ചെയ്യുന്നത്. കൃത്യമായ ലക്ഷ്യത്തോടും പുരോഗതിയോടും ഇന്ത്യയുടെ വികസനം നയിക്കുന്ന പ്രഗതി, അടിസ്ഥാനസൗകര്യ വികസനത്തില്‍ മാറ്റം വരുത്തി, സമാനമായ വെല്ലുവിളികള്‍ നേരിടുന്ന മറ്റു രാജ്യങ്ങള്‍ക്ക് മാതൃകയാകുന്നുവെന്നും പഠനം ചൂണ്ടിക്കാട്ടുന്നു.
‘കുറഞ്ഞ ഗവണ്മെന്റ് ഇടപെടല്‍, പരമാവധി ഭരണനിര്‍വഹണം’ എന്ന സമീപനത്തോടെ 2015 മാര്‍ച്ച് 25നാണു പ്രഗതി സമാരംഭിച്ചത്. പൗരന്മാരുടെ പരാതികള്‍ പരിഹരിക്കുകയും ഉത്തരവാദിത്വം ഉറപ്പാക്കുകയും ചെയ്യുന്നതിനിടയില്‍ ഇന്ത്യയുടെ വളര്‍ച്ച വേഗത്തില്‍ നിരീക്ഷിക്കുന്നതിനുള്ള സഹകരണം, സുതാര്യത, സാങ്കേതികവിദ്യ എന്നിവയ്ക്ക് പരിപാടി ഊന്നല്‍ നല്‍കുന്നു. കാലതാമസം, അധികച്ചെലവ്, നടപ്പാക്കുന്നതിലെ തടസ്സങ്ങള്‍ തുടങ്ങിയ പ്രശ്‌നങ്ങള്‍ അഭിസംബോധന ചെയ്ത്, പ്രധാന പദ്ധതികളുടെ പതിവ് അവലോകനം പ്ലാറ്റ് ഫോം സുഗമമാക്കുന്നു.
ഒമ്പതുവര്‍ഷംമുമ്പ് ആരംഭിച്ചതുമുതല്‍ 2023 ജൂണ്‍ വരെ 17.05 ലക്ഷം കോടി രൂപ മൂല്യമുള്ള, മുടങ്ങിക്കിടന്ന 340 പദ്ധതികള്‍ പ്രഗതി അവലോകനം ചെയ്തു. മൂന്നുമുതല്‍ 20 വര്‍ഷംവരെ എന്ന നിലയില്‍ കുടുങ്ങിക്കിടന്ന അത്തരം പദ്ധതികളുടെ കാര്യത്തില്‍, ഈ പ്ലാറ്റ്ഫോമിന്റെ ഘടനാപരമായ പ്രതിമാസ അവലോകനങ്ങളും ഡിജിറ്റല്‍ സങ്കേതങ്ങളും, സമയപരിധി ദശകങ്ങളില്‍നിന്ന് വെറും മാസങ്ങളിലേക്ക് വെട്ടിക്കുറച്ചു.
ഒരു പതിറ്റാണ്ടിലേറെ കാലതാമസത്തിനുശേഷം 3 വര്‍ഷത്തിനുള്ളില്‍ പൂര്‍ത്തിയാക്കിയ ബോഗിബീല്‍ പാലം, വര്‍ഷങ്ങളായുള്ള സ്തംഭനാവസ്ഥയെ അതിജീവിച്ച് 2025-ഓടെ പൂര്‍ത്തീകരണത്തിലേക്കു നീങ്ങുന്ന ജമ്മു-ബാരാമൂല റെയില്‍ ലിങ്ക്, പതിനഞ്ചിലധികം വര്‍ഷത്തെ ഭൂമി ഏറ്റെടുക്കല്‍ തടസ്സങ്ങള്‍ പരിഹരിച്ച് 2024 ഡിസംബറോടെ സമാരംഭിക്കുന്ന നവി മുംബൈ വിമാനത്താവളം തുടങ്ങിയവ ഇതിന് ഉദാഹരണങ്ങളാണ്. കര്‍ണാടകയിലെ ബെംഗളൂരുവില്‍ മെട്രോ റെയില്‍, ഒഡിഷയിലെ ഹരിദാസ്പൂര്‍-പാരാദീപ് റെയില്‍ പാത, മഹാരാഷ്ട്ര-ഗുജറാത്ത് ദേശീയ പാത എട്ടിലെ ദഹിസര്‍-സൂറത്ത് ഭാഗം, ഉത്തര്‍പ്രദേശ്-ബിഹാര്‍ ദേശീയ പാത രണ്ടിലെ വാരാണസി-ഔറംഗബാദ് ഭാഗം തുടങ്ങിയവയ്ക്കു കാലതാമസം വരാന്‍ ഇടയാക്കിയ നിരവധി പ്രതിസന്ധികള്‍ പരിഹരിച്ച്, നടപ്പാക്കുന്നതിലേക്കോ പൂര്‍ത്തീകരണത്തിലേക്കോ നയിക്കാന്‍ പ്രഗതിക്കായി. ജല്‍ ജീവന്‍ മിഷന്റെ കാര്യത്തില്‍ ഗാര്‍ഹിക ജലലഭ്യത 2019-ല്‍ 17% ആയിരുന്നത് 2024-ഓടെ 79% ആക്കി വര്‍ധിപ്പിക്കാനായി. ഈ പദ്ധതികളില്‍ ഓരോന്നിലും 25-ലധികം പ്രശ്‌നങ്ങള്‍ കണ്ടെത്തി പരിഹരിക്കാന്‍ പ്രഗതിക്കു കഴിഞ്ഞുവെന്നും പഠനം വ്യക്തമാക്കുന്നു.
പ്രധാനമന്ത്രി നരേന്ദ്ര മോദി നേരിട്ട് പ്രഗതി യോഗങ്ങള്‍ക്കു നേതൃത്വം നല്‍കുന്നത്, ഇതിനെ ഏറെ മുന്‍ഗണനയുള്ള സംരംഭമാക്കി മാറ്റുന്നു. നയങ്ങളുടെയും സ്‌കീമുകളുടെയും നിര്‍വഹണം നേരിട്ട് അവലോകനം ചെയ്യുന്നതിലൂടെ, ഫലപ്രദമായ ഭരണനിര്‍വഹണത്തിനുള്ള ദിശ നിര്‍ണയിക്കാന്‍ പ്രധാനമന്ത്രി സഹായിക്കുന്നു. സംസ്ഥാന-കേന്ദ്ര ഉദ്യോഗസ്ഥരുമായി അദ്ദേഹം സംവദിക്കുന്നത് വേഗത്തില്‍ തിരുത്തലുകള്‍ വരുത്തുന്നതിനും അനുവദിക്കുന്നു. പദ്ധതികള്‍ ദ്രുതഗതിയില്‍ പൂര്‍ത്തിയാക്കാനും ഉത്തരവാദിത്വം വര്‍ധിപ്പിക്കാനും പ്രധാനമന്ത്രിയുടെ നേരിട്ടുള്ള ഇടപെടല്‍ കാരണമാകുന്നു. പ്രഗതിയിലൂടെ, സുതാര്യതയ്ക്കുള്ള ഗവണ്മെന്റിന്റെ പ്രതിബദ്ധത പ്രധാനമന്ത്രി ശക്തിപ്പെടുത്തിയെന്നും പഠനം പറയുന്നു.
അടിസ്ഥാനസൗകര്യ വികസനത്തിനപ്പുറത്തേക്കു മുന്നേറുന്ന പ്രഗതി, സാമൂഹിക ഉന്നമനം നടത്തുകയും സുസ്ഥിരമായ നവീകരണത്തെ പ്രോത്സാഹിപ്പിക്കുകയും ചെയ്യുന്നു. ഇത് രാജ്യത്തുടനീളമുള്ള എല്ലാ പങ്കാളികള്‍ക്കും പ്രയോജനപ്പെടുന്നു. ഉദ്യോഗസ്ഥവൃന്ദത്തില്‍ വിപ്ലവം സൃഷ്ടിച്ച്, കാലതാമസത്തിന്റെയും കാര്യക്ഷമതയില്ലായ്മയുടെയും സംവിധാനത്തില്‍ നിന്ന് സുതാര്യത, തത്സമയ ആശയവിനിമയം, ദ്രുതഗതിയിലുള്ള നിര്‍വഹണം എന്നിവയിലേക്കുള്ള മാറ്റത്തിന് പ്രഗതി കാരണമായി. രാഷ്ട്രീയ വ്യത്യാസങ്ങളെ അതിജീവിച്ച് കേന്ദ്ര-സംസ്ഥാന ഗവണ്മെന്റുകള്‍ പൊതുലക്ഷ്യങ്ങള്‍ക്കായി ഒരുമിച്ച് പ്രവര്‍ത്തിക്കുന്ന സഹകരണ ഫെഡറലിസത്തിന്റെ കരുത്തുറ്റ ഉദാഹരണമായി പ്രഗതി മാറുന്നുവെന്നും ഓക്സ്ഫഡ് എസ്ബിഎസ്-ഗേറ്റ്സ് ഫൗണ്ടേഷന്‍ പഠനം വ്യക്തമാക്കുന്നു.
