ഐഎസ്എൽ ടൈറ്റിൽ സ്പോൺസറായി ജെ.എസ്.ഡബ്ല്യു എം.ജി മോട്ടോർ ഇന്ത്യ: പുതിയ സീസൺ ഒക്ടോബർ 10 മുതൽ

കൊച്ചി: മൂന്ന് വർഷത്തെ ഇടവേളയ്ക്ക് ശേഷം ഇന്ത്യൻ സൂപ്പർ ലീഗിന്റെ (ഐഎസ്എൽ) ടൈറ്റിൽ സ്പോൺസറായി പ്രമുഖ വാഹന നിർമ്മാണ കമ്പനിയായ ജെ.എസ്.ഡബ്ല്യു എം.ജി മോട്ടോർ ഇന്ത്യ എത്തുന്നു. ഇതോടെ പുതിയ പതിപ്പ് ‘എം.ജി ഇന്ത്യൻ സൂപ്പർ ലീഗ്’ എന്ന പേരിൽ അറിയപ്പെടും. ഒക്ടോബർ 10-ന് ആരംഭിക്കുന്ന പുതിയ സീസണിലെ ആദ്യ മത്സരങ്ങളിൽ ബംഗളൂരു എഫ്.സി സ്‌പോർട്ടിംഗ് ക്ലബ് ഡൽഹിയെയും, എഫ്.സി ഗോവ ചെന്നൈയിൻ എഫ്.സിയെയും നേരിടും. ഈ കൂട്ടായ്മ ഇന്ത്യൻ ഫുട്ബോളിന്റെ വളർച്ചയിലുള്ള വിശ്വാസത്തെ പ്രതിഫലിപ്പിക്കുന്നുവെന്ന് ഐഎസ്എൽ സിഇഒ രൺ യാദവ് വ്യക്തമാക്കി. കായിക രംഗത്തിലൂടെ സമൂഹത്തിൽ വലിയ മാറ്റങ്ങൾ സൃഷ്ടിക്കാനും, രാജ്യത്തുടനീളം ഫുട്ബോളിനെ കൂടുതൽ ജനകീയമാക്കാനും ഈ പങ്കാളിത്തം വഴിയൊരുക്കുമെന്ന് ജെ.എസ്.ഡബ്ല്യു എം.ജി മോട്ടോർ ഇന്ത്യ ചീഫ് കൊമേഴ്‌സ്യൽ ഓഫീസർ വിനയ് റെയ്‌‌ന അഭിപ്രായപ്പെട്ടു. സ്വന്തം മൈതാനത്തും എതിരാളികളുടെ മൈതാനത്തുമായി (ഹോം ആൻഡ് എവേ) നടക്കുന്ന പുതിയ പോരാട്ടങ്ങൾ കാണികൾക്ക് വേറിട്ട അനുഭവവും ലീഗിന് പുതിയ വാണിജ്യ മുന്നേറ്റവും നൽകുമെന്നാണ് പ്രതീക്ഷിക്കുന്നത്.