കൊച്ചി: അഡ്വൈസർമാരുടെയും ഡിസ്ട്രിബ്യൂഷൻ പങ്കാളികളുടെയും ഡിജിറ്റൽ ശേഷികൾ വർദ്ധിപ്പിക്കുന്നതിനായി ഐസിഐസിഐ പ്രുഡൻഷ്യൽ ലൈഫ് ഇൻഷുറൻസ് ‘ഐസിഐസിഐ ലൈഫ് പാർട്ണർ സ്റ്റാക്ക് 2.0’ അവതരിപ്പിച്ചു. സെയിൽസ്, ഓൺബോർഡിംഗ്, ഉപഭോക്തൃ സേവനം എന്നിവ കൂടുതൽ വേഗത്തിലും സുഗമമായും നിർവഹിക്കാൻ സഹായിക്കുന്ന എഐ-അധിഷ്ഠിത ടൂളുകളും വിപുലമായ ഡിജിറ്റൽ സംവിധാനങ്ങളുമാണ് ഇതിൽ ഉൾപ്പെടുത്തിയിരിക്കുന്നത്.
ഉപഭോക്താക്കൾക്ക് അനുയോജ്യമായ പോളിസികൾ നിർദ്ദേശിക്കാനും വ്യക്തിഗത കൊട്ടേഷനുകൾ തയ്യാറാക്കാനും ‘ഇക്വോട്ട് ആപ്പ്’, ‘ലിവ’ എന്നീ എഐ സംവിധാനങ്ങൾ അഡ്വൈസർമാരെ സഹായിക്കുന്നു. ആധാർ, സികെവൈസി ഉൾപ്പെടെയുള്ള ദേശീയ ഡാറ്റാബേസുകളുമായുള്ള സംയോജനം വഴി അപേക്ഷാ ഫോമുകളുടെ 70% വരെ മുൻകൂട്ടി പൂരിപ്പിക്കാനും കെവൈസി നടപടികൾ എളുപ്പമാക്കാനും സാധിക്കും. കൂടാതെ വാട്സ്ആപ്പ് ഉൾപ്പെടെയുള്ള വിവിധ പേയ്മെന്റ് രീതികളും എഐ വീഡിയോ വെരിഫിക്കേഷനും പ്ലാറ്റ്ഫോമിലുണ്ട്. പങ്കാളികൾക്ക് മികച്ച ഡിജിറ്റൽ പിന്തുണ നൽകി ഉപഭോക്തൃ അനുഭവം കൂടുതൽ ലളിതമാക്കുകയാണ് ഇതിന്റെ ലക്ഷ്യമെന്ന് ചീഫ് ഡിസ്ട്രിബ്യൂഷൻ ഓഫീസർ അമീഷ് ബാങ്കർ വ്യക്തമാക്കി. നിലവിൽ കമ്പനിയുടെ 99 ശതമാനം ബിസിനസ്സ് അപേക്ഷകളും ഡിജിറ്റലായാണ് നടക്കുന്നത്. 2027 സാമ്പത്തിക വർഷത്തിന്റെ ഒന്നാം പാദത്തിൽ 99.3% ക്ലെയിം സെറ്റിൽമെന്റ് അനുപാതം രേഖപ്പെടുത്താനും കമ്പനിക്ക് സാധിച്ചിട്ടുണ്ട്.
