കൊച്ചി: സൗദി അറേബ്യയിലെ നിലവിലെ സുരക്ഷാ സാഹചര്യം വഷളാകുന്ന പശ്ചാത്തലത്തിൽ, രാജ്യത്ത് കഴിയുന്ന എല്ലാ ഇന്ത്യൻ പൗരന്മാരുടെയും സുരക്ഷ ഉറപ്പാക്കുന്നതിനായി റിയാദിലെ ഇന്ത്യൻ എംബസി അടിയന്തര ജാഗ്രതാ നിർദ്ദേശം പുറപ്പെടുവിച്ചു. സമീപകാല സംഭവവികാസങ്ങളുടെയും ആക്രമണങ്ങളുടെയും പശ്ചാത്തലത്തിൽ പ്രവാസി ഭാരതീയർ അതീവ ജാഗ്രതയും കരുതലും പുലർത്തണമെന്ന് എംബസി ആവശ്യപ്പെട്ടു. കേന്ദ്ര വിദേശകാര്യ മന്ത്രാലയവും എംബസിയും സ്ഥിതിഗതികൾ അതീവ ശ്രദ്ധയോടെ നിരീക്ഷിച്ചുവരികയാണ്.
ഔദ്യോഗിക നിർദ്ദേശപ്രകാരം അത്യാവശ്യ ഘട്ടങ്ങളിലല്ലാതെ പൗരന്മാർ വീടുകളിൽ നിന്ന് പുറത്തിറങ്ങരുതെന്ന് അറിയിച്ചിട്ടുണ്ട്. സൈനിക നീക്കങ്ങൾ, സ്‌ഫോടനങ്ങൾ എന്നിവയുമായി ബന്ധപ്പെട്ട സ്ഥിരീകരിക്കാത്ത വാർത്തകളും ദൃശ്യങ്ങളും സമൂഹമാധ്യമങ്ങളിലൂടെ പ്രചരിപ്പിക്കരുതെന്ന് എംബസി കർശന മുന്നറിയിപ്പ് നൽകി. അടിയന്തര സാഹചര്യങ്ങളിൽ പ്രവാസികൾക്ക് ആവശ്യമായ നയതന്ത്ര സഹായങ്ങളും മാർഗ്ഗനിർദ്ദേശങ്ങളും ലഭ്യമാക്കുന്നതിനായി 24 മണിക്കൂറും പ്രവർത്തിക്കുന്ന ഹെൽപ്‌ലൈൻ കേന്ദ്രവും തുറന്നിട്ടുണ്ട്. ആവശ്യഘട്ടങ്ങളിൽ ബന്ധപ്പെടുന്നതിനായി 8002471234 എന്ന ടോൾ ഫ്രീ നമ്പറും എംബസി പ്രഖ്യാപിച്ചു.
