‘ഇന്ദ്ര-2026’ സംയുക്ത സൈനിക അഭ്യാസത്തിന് തുടക്കമായി
കൊച്ചി : റഷ്യൻ ഫെഡറേഷൻ നാവികസേനയുമായി (RuFN) ചേർന്നുള്ള ‘ഇന്ദ്ര 2026’ (Exercise INDRA 2026) സംയുക്ത നാവിക അഭ്യാസത്തിൽ പങ്കെടുക്കുന്നതിനായി ഇന്ത്യൻ നാവികസേനയുടെ യുദ്ധക്കപ്പലായ ‘ഐ.എൻ.എസ് സഹ്യാദ്രി’ റഷ്യയിലെ വ്ലാഡിവോസ്റ്റോക്ക് തുറമുഖത്തെത്തി. ഒക്ടോബർ 13 മുതൽ 18 വരെ നടക്കുന്ന ഈ ഉഭയകക്ഷി നാവിക അഭ്യാസം ഇരു രാജ്യങ്ങളും തമ്മിലുള്ള തന്ത്രപ്രധാനമായ പ്രതിരോധ പങ്കാളിത്തവും സമുദ്രമേഖലയിലെ പരസ്പര സഹകരണവും കൂടുതൽ ശക്തമാക്കും.
കേന്ദ്ര സർക്കാരിന്റെ ‘മഹാസാഗർ’ (MAHASAGAR – Mutual and Holistic Advancement for Security and Growth Across Regions) കാഴ്ചപ്പാടിന് അനുസൃതമായും, 2025 ഡിസംബറിൽ നടന്ന 23-ാമത് ഇന്ത്യ-റഷ്യ വാർഷിക ഉച്ചകോടിയുടെ തുടർനടപടിയായുമാണ് ഈ നാവിക അഭ്യാസം സംഘടിപ്പിച്ചിരിക്കുന്നത്. ഹാർബർ ഫേസ്, സീ ഫേസ് എന്നിങ്ങനെ രണ്ട് ഘട്ടങ്ങളായാണ് ഇന്ദ്ര 2026 നടക്കുന്നത്. കരയിലെ പ്രൊഫഷണൽ സംവാദങ്ങൾക്കും സാങ്കേതിക ആസൂത്രണങ്ങൾക്കും ശേഷം കടലിൽ സങ്കീർണ്ണമായ തന്ത്രപരമായ പോരാട്ട പരിശീലനങ്ങളും സംയുക്ത സൈനിക നീക്കങ്ങളും നടക്കും. ഇതോടൊപ്പം ഇരു സേനാംഗങ്ങളും തമ്മിലുള്ള സൗഹൃദം വർദ്ധിപ്പിക്കുന്നതിനായി സാംസ്കാരിക, കായിക പരിപാടികളും സംഘടിപ്പിച്ചിട്ടുണ്ട്.
