കൊച്ചി : പ്രമുഖ ഉപഭോക്തൃ ഇലക്ട്രിക്കൽ ഉൽപ്പന്ന നിർമ്മാതാക്കളായ വി-ഗാർഡ് ഇൻഡസ്ട്രീസ് ലിമിറ്റഡിന്റെ പുതിയ സി.എസ്.ആർ (CSR) സംരംഭമായ ‘വാത്സല്യം’ പദ്ധതിക്ക് തുടക്കമായി. നവജാതശിശുക്കൾ മുതൽ അഞ്ചു വയസ്സു വരെ പ്രായമുള്ള കുട്ടികളുടെ സമഗ്ര സംരക്ഷണവും വികസനവും ലക്ഷ്യമിട്ടാണ് ഈ സാമൂഹ്യപ്രതിബദ്ധതാ പദ്ധതി നടപ്പിലാക്കുന്നത്. സർക്കാർ അംഗീകൃത അനാഥാലയങ്ങളിൽ കഴിയുന്ന 10 കുഞ്ഞുങ്ങളെ ഏറ്റെടുത്ത് അവരുടെ പോഷകാഹാരം, ആരോഗ്യപരിപാലനം, ശുചിത്വം, പരിചരണം എന്നിവ ‘വാത്സല്യം’ പദ്ധതിയിലൂടെ വി-ഗാർഡ് ഉറപ്പാക്കും. കുട്ടികളുടെ വളർച്ചയുടെ ആദ്യകാലങ്ങളിൽ ശാരീരികവും മാനസികവുമായ ക്ഷേമം ഉറപ്പാക്കുകയാണ് ഇതിലൂടെ ലക്ഷ്യമിടുന്നത്.
പദ്ധതിയുടെ ഭാഗമായുള്ള സാമ്പത്തിക സഹായ ചെക്ക് വി-ഗാർഡ് ഇൻഡസ്ട്രീസ് ലിമിറ്റഡിന്റെയും വി-ഗാർഡ് ഫൗണ്ടേഷന്റെയും ഡയറക്ടർ ഡോ. റീനാ മിഥുൻ ചിറ്റിലപ്പിള്ളി ചൈൽഡ് വെൽഫെയർ കമ്മിറ്റി അധികൃതർക്ക് കൈമാറി. വി-ഗാർഡിന്റെ സി.എസ്.ആർ പ്രവർത്തനങ്ങളിൽ സ്ത്രീകളുടെയും കുട്ടികളുടെയും ഉന്നമനത്തിന് മുൻഗണന നൽകാറുണ്ടെന്നും, കുട്ടികളുടെ കൃത്യമായ വളർച്ചയ്ക്കും സുരക്ഷിതമായ ഭാവിക്കുമായി ഇത്തരം ജീവകാരുണ്യ പദ്ധതികൾ തുടരുമെന്നും ഡോ. റീനാ മിഥുൻ ചിറ്റിലപ്പിള്ളി വ്യക്തമാക്കി.
